ADLAWNG NATAWHAN NI GOBERNADOR ARIS GISAULOG PINAAGI SA OUTREACH MISSION SA ISLA TINTINAN SA UBAY

Makahuloganon ang kasaulogan sa adlaw'ng natawhan ni Gobernador Erico Aristotle Aumentado ngadto sa mga molupyo sa isla Tintinan, Ubay diin giselebrar nila kini pinaagi sa usa ka island outreach sa ilang dapit.

Malampuson ang maong kalihukan nga gipahigayon sa Tintinan covered court Disyembre 29 isip pagsaulog sa ika-46 nga tuig sa gobernador.

Pinangulohan sa mga sakop sa Medical Outreach Unit (MOU), ang maong outreach, inubanan sa Special Projects Section (SPS), Provincial Information and Media Office(PIMO), ug sa ubang mga kawani sa Governor's Office Executive Section (GO-ES) pagpahimutang sa medical mission.

Nikabat sa 246 ka mga pamilya ang libreng nakapahiling sa ilang panlawas pinaagi sa mga doktor gikan sa kagamhanang probinsyal.

Duna usa'y mga bitamina ug mga tambal nga gipanghatag sa tanan nga nagpakonsulta.

Gawas pa niini, ang mga residente nahatagan usab og serbisyong dental.

Sa laing bahin, sinako nga bugas ang giapod-apod ngadto sa tanang pamilya sa isla diin nikabat sa tag 10 ka kilo ang nadawat sa matag benepisyaryo.

Mokabat sa 183 ka mga school bags uban sa school supplies ang ilang gipanghatag ngadto sa mga kabataan uban sa pagtambayayong sa Tintinan Elementary School.

Libreng palugaw ang gidalit sa kapitolyo alang sa tanang residente nga giparisan sa 1,000 ka mga nutribun gikan sa buhatan ni Senador Imee Marcos, sa tanan nga nagpila pagdawat sa mga kaayuhan.

Naghugyaw ang kabataan sa mga padula nga gipasiugdahan sa kapitolyo diin gihatagan usab ang tanang kabataan og mga premyo.

Ang tanan nakadawat sa mga bag-ong bisting pinutos (clothing)gikan ni Gobernador Aumentado ug Congresswoman Vanessa Aumentado.

Nahimong mas mabulukon ang kasaulogan uban sa mainiton nga pagtimbaya sa mga islahanon ngadto sa gobernador pinanguluhan ni Kapitana Victoriana Alacida.

Natandog ang kasingkasing ni Aumentado sa mga pagtimbaya gikan sa mga kabataan ug tanang mga lumulupyo ug nakahilak kini sa kalipay.

Gipadangat sa Gobernador ang iyang dako nga pasalamat sa ilang gugma ngadto sa mga Aumentado .

Natapos ang kalihukan nga nagsadya ang tanan ug nagbalon sa daghang kaayuhan ang mga residente sa ilang pagpauli.

Ang mga empleyado sa kapitolyo malipayon usab nga nakabalik sa dakbayan sa Tagbilaran.PIMO/ALT