GOBERNADOR ARIS AUMENTADO MIDUAW SA MGA BADJAO

Surpresa alang sa mga Badjao ang paghidangat ni Gobernador Erico Aristotle Aumentado sa ilang komunidad sa Barangay Totolan, Dauis Pebrero 19.

Ang komunidad sa Badjao, nailhan nga usa sa tulo ka indigenous group nga misanay na sa lalawigan human kini nanimuyo sa Bohol. Ang laing duha mao ang Eskaya ug Ati.

Mga langyaw gikan sa Mindanao, ang maong indigenous group nanimuyo sa mga isla mao nga sa kadagatan usab ang ilang panginabuhi.

Naila sila nga mga mananagat, banggiitan nga musalom sa kadagatan ug maayo nga mamanaay.

Apan, nailhan usab ang mga bag-ong henerasyon sa pagamit sa mga bata ug puya sa pagpanglimos sa kadalanan ug sa kahugaw sa dapit sa kadagatan nga ilang gipuy-an.

Miduaw si Aumentado sa mga Badjao aron personal niya nga masuta ang ilang kahimtang. Sa maong pagduaw, gihimo usab ang ceremonial turn-over sa Improved Badjao Child Development Center (CDC).

Ang maong proyekto bunga sa koordinasyon sa kagamhanang probinsyal pinaagi sa Office of the Provincial Social Welfare and Development (OPSWD) nga gipanguluhan ni Mita Tecson, uban sa Inflight Menu Travel Corporation pinangulohan ni Ron Aldrich Golingo, chief executive officer (CEO).

Matud niTecson, ang ilang buhatan lamang ang miresponde sa mensahe gikan kang Golingo nga nangayo og impormasyon sa mga kwalipikado nga indigenous people (IP) nga mahimong tabangan isip kabahin sa corporate social responsibility efforts sa ilang kompanya. Kini ang hinungdan nga gisagop usab sa Kapitolyo ang maong kalihukan.

Gipili sa OPSWD ang Badjao community nga benepisyaryo sa maong tabang aron sa pagpaayo sa Badjao CDC.

Giimplementar ang proyekto pinaagi sa Bohol Child Development Workers Association (BCDWA) Inc. nga mao ang midawat sa donasyon aron hapsay ang taho kung giunsa paggamit ang maong hinabang.

Mikabat sa tunga sa milyon ang donasyon nga gitunol ni Golingo ngadto sa BCDWA Inc. Niadtong Mayo 27, 2023.

Gisuportahan kini sa lungsod sa Dauis pinaagi sa Municipal Social Welfare and Development Office (MSWDO) ug sa barangay Totolan diin dunay duha ka day care workers nga nag-atiman sa mga bata.

Sulod sa siyam ka buwan nga konstruksyon, mibarog ang gibag-o nga day care center. Nahimutang kini taliwala sa komunidad sa mga Badjao. Gisangkapan kini sa mga gikinahanglan sa center, lakip ang pag-ayo sa kahoy nga agianan paingun sa center ug pagtaud sa linya sa kuryente niini.

Uban ni Bokal Lucille Lagunay, sa Committee on Social Services sa hunta probinsyal ug ni Tecson, gipanguluhan sa gobernador ang seremonyas sa pagtugyan sa maong proyekto ngadto sa Barangay Totolan pinaagi ni Kapitan Ramon Rulona, ug sa hepe sa mga Badjao nga si Mario Cuham.

Si Aumentado nagkanayon nga naggahin ang iyang buhatan og usa ka milyon alang sa sa pagpasemento sa mga agianan, pagpahimo og mga pansayan ug pagpahinlo sa ilang palibot.

Emosyonal si Aumentado ug wala kapugngi ang iyang mga luha atol sa iyang pakigpulong tungod sa iyang gibati nga kaluoy ngadto sa mga Badjao.

Gidasig niya sila sa pagkooperar sa Kapitolyo kay ang iyang administrasyon daghan og plano alang sa pagpalambo sa kalidad sa ilang kahimtang.

Si Aumentado misaad nga magbalik-balik sa maong komunidad aron matutukan ang pag-atiman kanila.

Naghandum siya nga moabut ang adlaw nga mapapas ang ubos nga pagtan-aw sa katilingban ngadto kanila.

Dugang ni Aumentado, kung dunay mga Badjao nga buot makalampos sa pagtungha, suportahan kini sa kagamhanang probinsyal aron mas mudaghan ang mga maestra, nurse ug uban pa nga propesyonal gikan sa ilang komunidad.

Gidasig niya kini nga magtukod og kapunongan aron kahatagan sila og panginabuhi, apan pasidaan niya nga gikinahanglan usab nila nga ampingan ang ilang kalikopan kay anaa diha ang ilang kapaninguhaan.

Matud ni Aumentado, mahinungdanon ang Badjao community kay kabahin sila sa kultura ug komunidad sa lalawigan.ALT/PIMO