Mitambong sa Provincial Athletic Meet si Gobernador Aris Aumentado didto sa Carmen Sports Complex.
Si Aumentado isip mao ang chairman sa Bohol Provincial Sports Council, nangulo sa opening ceremonies sa nahisgutan nga athletic meet ning tuig 2024 nga gitambungan sa tanang mga pampubliko nga tunghaan sa elementarya ug sekondarya, sa tulo ka Congressional Districts(CD-1, CD-II, CD-III) uban sa Bohol Associations of Catholic Schools (BACS)-Tagbilaran, BACS- Talibon ug Bohol Institute of Technology-International College (BIT-IC).
Sa tema nga "One team; one goal. Abante Bohol", isip keynote speaker, si Aumentado nagkanayon nga, mas gipakusgan sa administrasyon karon ang mga kalihukan sa sports para sa mga magtutungha, pinaagi sa pagdoble ngadto sa dos milyones sa ayuda alang sa provincial athletic meet. Apil na niini ang paghatag og insakto nga suporta alang sa mga atleta ug coaches aron sa sunod nga mga kompetisyon mas labwan pa ang nakuha nga medalya, atol sa Batang Pinoy ug Philippine National Games nga 33 ka medalya.
Matud ni Aumentado, pipila ka semana gikan karon, pinaagi sa usa ka memorandum circular, igalusad ang HANAS Program alang sa pagpahigayon og mga sports clinic, BOLA ug PART program, alang sa sporting infrastructures, recruitement ug trainings alang sa mga atleta, SIPAC program alang sa paghatag og ganti sa mga mananaog sa mga nasudnong kompetisyon.
Kalihukan kini aron mabansay ang mga kabatan-onan sa natad sa sports ug maandam ang mga atleta sa ilang pag-apil sa nagkalain-lain nga paduwa sa gawas sa probinsya, ilabina sa kaulohan.
Mudangat ngadto sa tulo ka adlaw ang kompetisyon, Peb. 16-18 nga naglangkob sa Archery, Arnis, Badminton, Baseball, Basketball, Billiards,Boxing, Chess, Dancesports, Football, Futsal, Gymnastics, Pencak Silat, Sepak Takraw, Softball, Swimming, Table Tennis, Taekwando, Volleyball,Tennis, Wrestling, Wushu.
Samtang sa laing bahin, atol sa kalihukan, gipahigayon ang ceremonial turn-over ug gitunol sa Gobernador ngadto kang Mayor Che Toribio Delos Reyes ang kantidad Php2,270,000 alang sa LGU Carmen. Ang Php270K niini para sa ilang bahin sa sand and gravel share ug ang duha ka milyon ayuda para sa repair and rehab sa ilang Sports Complex.
Gipadangat ni Aumentado ngadto sa tanang partisipante ang iyang syento por syento nga suporta sa DepEd-Bohol sa sports development pinaagi sa Provincial Youth Development Office.
Kauban ni Gov. Aris si Bise Gobernador Dionisio Balite sa maong kalihukan, kinsa mihatag usab og pakigpulong uban ni Mayor Che Toribio Delos Reyes ug sa mga kaubanan gikan sa Kapitolyo.ALT/PIMO
No comments:
Post a Comment