MGA SAKOP SA 2 KA MEDICAL MISSION GIPASIDUNGGAN SA KAPITOLYO

Gipasidunggan sa kagamhanang probinsyal ang mga sakop sa Faces of Tomorrow ug Ishi International Mission human sa ilang malampuson nga medical mission.

Gipahigayon ang recognition night alang sa mga nisalmot sa maong serbisyo Pebrero 16 didto sa Kapitolyo pinangulohan mismo ni Gobernador Erico Aristotle Aumentado.

Ang Faces of Tomorrow medical mission nga didto gipahigayon sa Governor Celestino Gallares Memorial Medical Center (CGMMC) uban sa pagbulig ni Kongresista Vanessa Cadorna-Aumentado sa ikaduhang distrito.

Nahidangat ang Faces of Tomorrow (FOT) Cleft Lip and Palate Surgical Mission Pebrero 10 pinangulohan ni Dr. Brian Keith Rubinstein, FOT director.

Nagsugod ang screening alang sa mga pasyente niadtong Pebrero 11 samtang ang mga operasyon gihimo Pebrero 12-16.

Atol sa gihimong serbisyo medikal, mikabat sa 82 ka mga operasyon ang malampusong natapos ug nakatabang sa 32 ka mga pasyente.

Ang FOT dunay 25 ka mga boluntaryo nga surgeons, anesthesiologists, nurses ug uban pa diin tugbang niini ang mga doktor ug tabang teknikal ug medikal gikan sa nagkalain-laing hospital nga gipadagan sa lalawigan.

Laing medical mission usab ang gipahigayon sa Pebrero 16 ubos sa pagpasiugda sa Ishi International Mission didto sa Don Emilio del Valle Memorial Hospital (DEVMH). Ubos sa pagdumala ni Dr. Asha Bale, ang founding director sa maong pundok, ilang naserbisyuhan ang 26 ka mga pasyente.

Sa gihimong recognition night, usa ka testimonyo ang gipadangat ni Dr. Neilboy Calmares, medical officer III sa Surigao Del Sur nga volunteer sa FOT, ug iyang gihinubay ang iyang kasinatian sa FOT.

Iyang gisaysay nga nakabaton siya og paglaum gikan sa maong medical mission human sa makadaghan nga pagdumili sa ubang medical missions kaniya gumikan sa iyang taas nga pangidaron.

"Me, before the one who has been helped..now, helping other people because of Faces of Tomorrow", matud pa ni Calmares.

Dugang pa niya, dinhi sa Bohol niya nakab-ot ang iyang pangandoy sa serbisyong medikal nga cleft lip and palate surgery. Sukad sa malampuson nga operasyon, nakahukom si Calmares nga magdoktor usab aron makatabang sa mga nagsagubang og suliran sama sa iyang naagian.

Gipadangat ni Aumentado ang iyang mainiton nga pasalamat sa aktibo nga pagtambayayongay sa kagamhanang probinsyal pinaagi sa Governor's Office-Medical Outreach Unit (GO- MOU), GCGMMC-Tagbilaran ug DEDVMH-Ubay uban sa FOT ug Ishi International Mission.

Gitunol ngadto sa mga sakop sa medical mission ang plake sa pasidungog ug ang silver tarsier nga kinuptanan (token) gikan sa Kapitolyo.

Lakip sa gihatagan sa mga pasidungog si Kongresista Aumentado, ang 47th IB PA pinanguluhan ni Lt. Col. Magno Mapalad, nga girepresentahan ni Sgt. Erwin Ore Civil Affairs 47IB, 3ID, PA.

Gipasalamatan usab ang mga tinugyanan ug kawani sa Shepherds Well Ministry, Congressman Simeon Toribio G. Memorial Hospital, Catigbian District Hospital, Clarin Community Hospital, Francisco Dagohoy Memorial Hospital, Congressman Natalio P. Castillo Memorial Hospital, Pres. Carlos P. Garcia Memorial Hospital, Congressman Maximino Garcia Memorial Hospital, Candijay Municipal Community Hospital, DEDVMH uban sa LGU-Ubay, GCGMMC, Provincial Health Office ug si Dr. Cesar Tomas Lopez.

Gawas ni Aumentado, mitambong usab sa maong kalihukan sila si Bokal Nicanor Besas ug Romulo Cepedoza ug Dave Mar, representante Ni Bise Gobernador Dionisio Victor Balite.ALT/PIMO