"Dili kita muhunong sa pagbuhat sa maayo ug matarong aron mapanalipdan nato ang atong kalikopan, samtang atong ipahiluna nga ang tanan makasakay sa kalamboan", kini mao ang tugon ni Gobernador Erico Aristotle Aumentado Mayo 28.
Giila sa Gobernador ug gipasalamatan ang kabubut-on sa Labaw'ng Makagagahom, samtang gideklarar atubangan sa mga empleyado ang iyang mapaubsanon nga pagsanong sa Preventive Suspension Order nga gipakanaog sa Office of the Ombudsman batok kaniya ug sa laing 68 ka mga opisyales sa pangagamhanan penetsahan Mayo 20, 2024.
Taliwala sa kasubo sa Kapitolyo, ug sa paghugyaw sa pipila ka mga kaaway sa politika, wala muundang ang Gobernador pagpadangat og mga pagdasig sa katawhang Bol-anon, pinaagi sa iyang "facebook countdown", isip pahinumdum nga mulurang ra ang tanan.
Natapos ang usa ka bulan nga countdown Hunyo 28, apan walay senyales nga mahibalik sa Kapitolyo ang Gobernador.
Imbes nga kawad-an og paglaum, isip sibilyan niadtong higayona, mas gipakusgan pa hinuon niini ang iyang mga personal nga adbokasiya, pagtabang sa anaa sa ubos nga hut-ong sa katilingban sama sa Balay sa Paglaum.
Agosto 2 adlaw'ng Byernes, sama sa naandan, mipadangat og mensahe si Provincial Administrator Asteria Caberte, nga gikinahanglan mutambong sa "flag retreat ceremony" ang mga empleyado.
Kumpleto ang presensya sa mga kadagkuan sa Kapitolyo sama kanila ni Caberte, Acting Vice Governor Tita Virtudazo Baja ug mga bokal sa Sangguniang Panlalawigan, Provincial Legal Officer, Atty. Handel Lagunay, Chief of Staff Atty. Filipina Piollo, Supervising Administrative Officer Metodio Maraguinot Jr., Provincial Human Resource Management and Development Officer Ann Mariquit D. Oppus ug uban pa nga mga Department Heads ug mga empleyado.
72 ka adlaw sukad sa "suspension order",samtang paingon na magsugod ang seremonyas miabot si Gobernador Aris Aumentado sa Kapitolyo ug gisugat kini sa pagsadya, ug paghugyaw.
Bisan tuod og walay gisulti nga bisan unsa ang Gobernador, mipahiyom lang kini ug miwara-wara sa iyang mga kamot ngadto sa mga empleyado, apan ang iyang presensya sa Kapitolyo, sukad siya isuspenso, igo na nga senyales nga natuman niadtong taknaa ang iyang mensahe sa diha nga gitay-og ang iyang politikanhong karera ug baruganan isip suluguon sa katawhan, diin matud pa niini, "mubalik ako."
Ang maayong balita niadtong tungura mao ang paglibkas sa Buhatan sa Ombudsman sa pagkasuspenso kang Aumentado ug sa laing 30 ka mga opisyales penetsahan Hulyo 31, 2024.
Subay sa desisyon, dili na kinahanglanon ang "suspension order", kay anaa na sa hingtungdang buhatan ang gikinahanglan nga mga dokomento alang sa pagdesisyon sa kaso nga may kalambigitan sa Captain's Peak Resort sa Sagbayan, Bohol.
Pangatarungan ni Aumentado subay sa iyang "motion for reconsideration," sa diha nga iyang nasayran ang bahin sa resort, gipaimbestigahan niya dayon kini, kay dili siya buot nga adunay balaod nga masupak.
Pagdugang niini, wala kaniya ang kagahom pag-aprobar sa "permits" ug "clearances" ug wala siya'y kalambigitan sa nahisgutang estraktura.
Busa ang posisyon pagka-gobernador dili makaapekto sa imbestigasyon bahin niini.
Mao usab kini ang baruganan sa Ombudsman, nga ang ilang pagbuhat sa ilang mga katungdanan subay sa ilang mga posisyon, dili makaapekto sa imbestigasyon.
Nahibalik sa ilang mga posisyon, sila si Gobernador Aris Aumentado, Atty. John Titus Vistal, Provincial Planning and Development Officer, Batuan Mayor Antonino Jumawid, Catigbian Mayor Elizabeth Mandin-Pace, Clarin Mayor Eugeniano Ibarra, Valencia Mayor Dionisio Neil Balite, Bilar Mayor Norman Palacio ug Vice Mayor Ranulfo Maligmat, Sierra Bullones Mayor Michael Doria ug Vice Mayor Simplicio Maestrado, Jr.
Gilibkas usab ang pagsuspenso kanila ni Brgy. Capt. James Diolan sa Behind the Clouds, Batuan; Brgy. Capt. Ian Bernadez sa Santa Cruz, Batuan; Brgy. Capt. Emmanuel Jumawid sa Poblacion Vieja, Batuan; Brgy. Capt. Maria Fe Jala sa Janlud, Batuan; Brgy. Capt. Flaviano Pacatang sa Garcia, Batuan; Brgy. Capt. Rolando Pataca sa Rizal, Batuan; Brgy. Capt. Gerardo Salces sa Cantigdas, Batuan uban kanila ni Brgy. Capt. Cecilio Tesio sa Nueva Vida Norte, Carmen; Brgy. Capt. Nelito Gallogo sa Montevedio, Carmen; Brgy. Capt. Querino Aparicio sa La Victoria, Carmen; ug Brgy. Capt. Gregorio Digamon sa Nueva Vida Sur, Carmen.
Apil usab ang Regional Director of the Office of Civil Defense (OCD) Region 7 Eugene Cabrera; Ma. Victoria Abrera, DENR-EMB Regional Director; Marlou Salazar, OCD-7; Engr. Jesus Zamora, Jr., Department of Science and Technology Region 7 Director; Angel Enriquez, Department of Agriculture Region 7 Director; Edilberto Paradela, DOST-7; Paquito Melicor, Jr., Department of Environment and Natural Resources PAMB Chairman, Gilbert Gonzales RD DENR-7 PAMB chairman, ug Ricardo Francisco Toribio Mun. Administrator, Carmen,Bohol.
Sama sa gibuhiang mensahe ni Aumentado sa iyang pagkanaog sa Kapitolyo, "I shall return," miabot na ang panahon nga ang Probinsya sa Bohol mahibalik pag-usab ubos sa amahanong pagpangga ug pag-amoma ni Gobernador Aris Aumentado sa direksyon nga Abante Bohol.PIMO/ALT
No comments:
Post a Comment