GOBERNADOR SA BOHOL BALIK-DUAW SA KAISLAHAN

Determinado ang Gobernador sa Bohol, Gov. Aris Aumentado sa iyang kawsa, pagpalambo sa kahimtang sa mga kaislahan nga bisan sa naglagiting nga kainit sa adlaw niadtong tungura, gisungsong niya kini, aron sa paghimamat sa mga islahanon sa barangay Maomawan, Bien Unido, Disyembre 12.

Si Aumentado mismo ang nangulo sa gipahigayon nga medical mission sa maong isla bisan kon kinahanglan niya nga antuson ang inadlaw-adlaw nga kainit nga maoy naandan sa katawhan sa maong isla.

Giduyogan ang gobernador sa bahan gikan sa Governor’s Office Medical Outreach Unit (GO-MOU) nga nag-apod-apod og tambal ug bitamina gawas sa libreng konsultasyon sa mga mananambal nga sakop sa mission.

Atol sa maong pagduaw, naghatag usab og mga school bags alang sa mga kabataan, tsinelas, food packs og 10 ka kilong bugas matag pamily.

Busog ang tanan sa gidalit nga lugaw sa kagamhanang probinsyal aron malikayan ang kagutom samtang gipahigayon ang serbisyo nga gitanyag sa lalawigan.

Padayon ang pagpadangat ni Senadora Imee Marcos sa iyang suporta ngadto sa gobernador pinaagi sa assistance to individuals in crisis situations (AICS)

Ubos sa buhatan sa senadora, 480 ka pamilya ang gitagan-an nga mahatagan sa pinansyal nga ayuda nga kantidad P3,000.

Nakita ni Aumentado nga nagkinahanglan ang barangay og covered court, hinungdan nga nisaad ang gobernador nga mohatag sa barangay sa kantidad nga P1,000,000 gikinahanglan alang niini.

Nipadangat si Aumentado sa iyang pasalamat sa mainiton nga pagdawat kaniya sa mga katawhan sa maong isla pinanguluhan ni Barangay Kapitan Bernadita Pagal ingon man sa pakigtambayayong sa ubang mga sponsors ning maong kalihukan.

Sa maong pagduaw, kaabag ni Aumentado ang tinugyanan sa seguridad sama sa Coast Guard Station Eastern Bohol, 21st Special Forces Riverine Company, Provincial Maritime Force Company, Ubay PMFC ug Bien Unido Local Police.

Kinasingkasing nga nagpadayag sa iyang pagpasalamat ang gobernador uban ni Kongresista Vanessa Aumentado sa higayon nga ipadangat mismo sa tugkaran sa mga molupyo sa kaislahan ang tinud-anay nga serbisyo gikan sa kagamhanang probinsyal.PIMO/ ALT