Gipanguluhan ni Gobernador Aris Aumentado ang ceremonial turn-over sa duha ka edipisyo nga anaa mahimutang sa Garcia Memorial Provincial Hospital (GMPH) lungsod sa Talibon, Disyembre 14.
Gipahibalo sa gobernador nga bukas na sa publiko ang treatment and rehabilitation center ingon man ang storage building sa maong tambalanan atol sa gipahigayon nga ribbon cutting ug blessing.
Ang duha ka proyekto nagkantidad og P10,410,660.58, pondo gikan sa 20 %development fund sa lalawigan.
Kauban ni Aumentado sa turn-over ang BNYU Development Corporation nga girepresentahan ni Engr. Edwin Vallejos, uban ni Engr. Camilo Gasatan sa Provincial Engineer’s Office, Dr. Miguelito Jayomal hepe sa GMPH, ug Janus Elerio Sumalinog sa Engineering Department sa GMPH.
Nagpadayag si Aumentado sa iyang kalipay nga, dungan sa maong turn-over, dunay mga natapos ubos sa programa sa Center for Drug Education and Counselling (CeDEC). Subay niini, iyang gipadangat niini iyang pahalipay sa siyam nga nigradwar.
Sukad 2019, 407 ang nitungha ubos sa maong programa, 90 na ang nahuman ug 249 ang nagapadayon nga aktibo sa programa alang sa kabag-uhan sa ilang kinabuhi.
Dungan sa maong mga kalihukan, gipahigayon usab ang soft opening sa Women and Children Protection Unit.
Si Preciosa Evardo, admin head, nipahibalo sa pinakauwahi nga pasidungog nga ilang nadawat gumikan sa ilang tinud-anay nga serbisyo.
Pipila niini mao ang DOH Star Awards, Leadership, Adapt Awardee from USAID, DOH Cebu Summit Awards ug DRRMH.
Isip tubag, gipadangat ni Aumentado ang iyang kinasingkasing nga pagdayeg sa aktibo nga pagdumala sa ospital sa GMPH.PIMO/ALT
No comments:
Post a Comment