Natuman ang pangandoy sa usa ka magtiayon sa lungsod sa Duero dihang giturn-over ni Gobernador Erico Aristotle Aumentado ngadto kanila ang usa ka balay ubos sa proyektong Libreng Alagad ug Balay (LAB).
Ang palaran nga benepisyaryo mao ang magtiayon nga sila si Joel ug Bienvenida Escabusa. Si Joel, usa ka kanhi sakop sa CAFGU, samtang ang iyang kapikas, kanhi membro ug benepisyaryo sa Pantawid Pamilyang Pilipino Program (4Ps).
Gipadangat ni Aumentado ang iyang pahalipay kang Police Col. Lorenzo Batuan ug sa tibuok Bohol Police Provincial Office (BPPO), gumikan sa malampuson nga operasyon sa project LAB.
Bisan tuod og bag-o pa ang proyekto, ika-13 na ang mga Escabusa sa nahatagan og disente nga kapuy-an.
Nagkanayon si Batuan nga nagsugod ang Project LAB gumikan sa pagpaabot og tabang pinansyal ni Congresswoman Vanessa Aumentado ug Gobernador Aumentado alang sa proyekto.
Tumong sa programa nga pinaagi sa pagtinabangay sa local government unit, mahatagan og desente nga kapuy-an ang mga taw nga angayang tabangan sumala sa kriterya sa BPPO.
Usa kini ka mensahe ngadto sa nagduhaduha pagsalig sa gobyerno nga ang administrasyong Aumentado-Balite seryoso pagtagad ug pag-alagad bisan pa sa hilit nga bahin sa komunidad.
Si Capt. Marvin A. Chin, hepe sa Duero Municipal Police Station, nagpadangat sa iyang dako nga pasalamat sa gobernador ug sa BPPO pagpili sa Duero nga mahimong kabahin sa proyekto.
Giaghat usab niya ang katawhan nga dili tanan nanginahanglan matagaan, apan ilang gipaningkamutan nga ang mas angayang hatagan og balay mao gayud ang nakadawat sa tabang sa gobyerno.
Niadtong adlawa, si Aumentado nihatag sa kantidad P300,000 ngadto kang Batuan isip dugang pondo sa proyekto alang ning maong buwan sa Disyembre.
Nasayran nga laing P300,000 ang ipuno alang sa buwan sa Enero aron maangay ang pondo ngadto sa tulo ka distrito.
Sa laing bahin, matod ni Aumentado unang higayon sa iyang pagsulod sa maong lugar nakita niya nga lisod agi-an ang ilang mga kalsada.
Gipahibalo niini ngadto sa mga molupyo sa Imelda, ilabina kang Punong Barangay Roselle Feliselda, ang iyang plano nga iapil sa sunod nga batch sa P3.1 bilyones nga Philippine Rural Development Project ( PRDP) ang mga lisod agian nga kalsada sa maong dapit.
Hinuon, matod pa niya, dili siya makapaniguro nga matuman kini kay aduna nay plano alang niini.
Apan dugang ni Aumentado, iyang paningkamutan nga maapil ang Imelda sa mga dapit nga hatagan og farm to market roads.
Naghisgutan usab ni Aumentado ang paghatag og mga proyektong pang-livelihood sa katawhan sa maong dapit.
Ang katawhan sa barangay nagpadayag sa ilang kalipay ug paglaom sa ilang nabati nga tinguha alang sa ilang komunidad, ilabina ang mga senior citizens nga nakadawat og ginagmay nga pahalipay gikan sa gobernador sa iyang pagduaw.
Pasalig ni Aumentado nga suportado sa iyang administrasyon ang Project LAB dili lamang sa kaislahan ug kabukiran kundili sa tibuok Bohol.
Kini kabahin sa paningkamut sa gobernador ug ni Kongresista Vanvan Aumentado nga ilang maserbisyuhan sa tinud- anay ang katawhang Bol- anon.ALT
No comments:
Post a Comment