Mitambong si First Lady Marie Louise "Liza" Araneta-Marcos sa Opening Salvo sa kasaulogan sa Probinsya sa Sugbo sa ilang ika-455 nga Founding Anniversary, Agosto 5.
Sa pagpangulo ni Gobernadora Gwendolyn Garcia, gibuksan niini didto sa Capitol Compound ang usa ka buwan nga selebrasyon sa Sugbo.
Kauban ni Garcia si Bise Gobernador Hilario Davide III, mga bokal sa Sangguniang Panlalawigan, mga mayores ug uban pa nga kadagkuan.
Uban sa Gobernadora, tree planting sa kahoy nga Narra ang unang gibuhat sa First Lady. Gibuksan niini ang usa ka marker, diin gihinganlan og Marie Louise ang kahoy nga iyang gitanom. Matud pa, simbolo kini sa kasaulogan ug sa dedikasyon ni FL Marcos ngadto sa mga Sugbuanon.
Gipahigayon usab ang "ribbon cutting sa Tabo sa Kapitolyo uban ni Tourism Secretary Christina Garcia-Frasco, isip senyales nga abri na kini ngadto sa publiko.
Sa laing bahin, gipahigayon ang Ceremonial Turn-over sa mga Bagong Pilipinas Mobile Clinic ngadto sa 16 ka probinsya sa Rehiyon VI, VII ug VIII.
Gipangunahan sa First Lady ang maong turn-over uban kang Dr. Teodoro J. Herbosa, Secretary of Health, ug Dr. Glenn Mathew G. Baggao, Undersecretary of Health sa PHSC.
Ang mga probinsya nga gihatagan sa maong Bagong Pilipinas mobile clinic mao ang Aklan, Antique, Capiz, Guimaras, Iloilo, Negros Occidental, Negros Oriental, Cebu, Siquijor, Biliran, Leyte, Southern Leyte, Northern Samar, Samar, Eastern Samar, ug Bohol.
Gipadangat ni Aumentado ang iyang mga pagpasalamat sa Nasudnong Pangagamhanan, sa nadawat nga sakyanan, gumikan makatabang kini sa gipasiugdahan nga Medical Mission, pagpanghatod sa tinud-anay nga serbisyong panlawas ngadto sa mga lumulupyo nga anaa sa suok nga bahin sa komunidad.
Kauban ni Aumentado sa turn-over sila si Bise Gobernadora Tita Virtudazo Baja ug Dr. Cesar Tomas Lopez sa Provincial Health Office.
Sa laing bahin, nakahinabi ni Gobernador Aris Aumentado ang First Lady, atol sa panagtapok sa tanang mga gobernador sa Rehiyong Kabisayaan, didto sa Provincial Social Hall samtang gilusad ang pormal nga pag-abiabi ngadto sa First Lady.
Nakabaton usab og higayon ang mga gobernador sa mubo nga kukabildo.
Gipanguluhan ni Gobernadora Gwen Garcia ang paglagda og manifesto sa suporta ngadto kang Presidente Ferdinand "Bongbong" Marcos Jr. ug sa Bagong Pilipinas.
Emosyonal ang First Lady samtang nagpasalamat sa mainitong pagdawat sa Sugbo kaniya. "It's not perfect, my husband is really trying. It's not easy what he is doing but unity has a lot to do with it," ekspresar sa first lady ngadto sa mga Sugbuanon.
Tubag ni Gov. Gwen Garcia, "We, a United Cebu, stand firmly behind the leadership of our President Ferdinand Marcos Jr."
"It is in the hands of the Governors who will lead each province to rally all political leaders of your respective provinces for and in support of the man we choose to lead us, no other than Pres. Bongbong Marcos." Kini maoy hagit ni Garcia ngadto sa mga Gobernador sa rehiyong kabisayaan.
Milagda si Gobernador Aris Aumentado ug Bise Gobernadora Tita Virtudazo Baja, sa Manifesto pagsuporta sa Bagong Pilipinas kauban sa laing pito ka mga Gobernador. Sa kinatibuk-an, siyam ka mga Gobernador sa kabisayaan ang mideklarar sa pagsuporta ug alyansa ngadto sa administrasyon.
Ang mga Gobernador nga milagda sa manifesto mao sila si Cebu Governor Gwen Garcia, Aklan Gov. Jose Enrique Miraflores, Guimaras Gov. Joaquin Carlos Nava, Iloilo Gov. Arthur Defensor Jr., Southern Leyte Gov. Damian Mercado, Eastern Samar Gov. Ben Evardone, Siquijor Gov. Jake Villa, Negros Occidental Gov. Eugenio Jose Lacson, ug Bohol Governor Erico Aristotle Aumentado. ALT
No comments:
Post a Comment