Gipadangat ni Gobernador Erico Aristotle "Aris" Aumentado ang pahalipay ngadto kang Jessie Meñosa ug Marjenil Cañete Meñosa, lumulupyo sa Pinayagan Norte, Tubigon.
Ang magtiayong Meñosa benepisyaryo sa ika-28 nga natukod nga balay gikan sa Libreng Alagad ug Balay sa BPPO ug sa Balay sa Paglaum ni Congresswoman Van-van Aumentado ug Gobernador Aris Aumentado.
Gipahigayon sa Gobernador ang turn-over ceremony sa maong balay Septyembre 2, 2024, uban ni PLTCOL NORMAN NUEZ Chief PCADU, PMAJ Neon Francis B. Alvarez, ug mga opisyales sa barangay nga gipanguluhan ni Kapitan Roy J. Ladra.
Ang magtiayong Meñosa, adunay upat ka buok anak, nga nagpanuigon ang kamagwangan og kinse anyos samtang ang kamanghuran pito ka buwan sukad nahimugso.
Ang maong balay bunga sa adbokasiya ni Congresswoman Van-van Aumentado ug Gobernador Aris Aumentado diin personal nga pondo sa magtiayon ang gigamit para sa mga materyales niini. Nagkantidad ang maong balay og P250,000.
Ubos sa direktiba ni PCOl LORENZO A. BATUAN, gipanguluhan ni Alvarez ang pagtukod sa maong pinuy-anan.
Matud pa nga ang kapulisan mao ang magbuot kung kinsa ang himoong benepisyaryo subay sa kategorya ug guidelines gikan sa Provincial Director.
Pahimangno ni Aumentado, ampingan sa mga benepisyaryo ang balay nga gikahatag na kanila ug giawhag nga magtinabangay aron mas daghan pa ang matabangan sa maong programa.PIMO/ALT
No comments:
Post a Comment