REKLAMO KABAHIN SA MGA NEGOSYANTE SA PANGLAO NGA DILI REHISTRADO SA BIR ANG RESIBO, GIAKSYONAN NI GOBERNADOR ARIS AUMENTADO

Gipatawag ni Gobernador Erico Aristotle Aumentado ang mga kadagkuan sa Bureau of Internal Revenue (BIR)-Bohol, RDO 084, aron kahatagan og tukma nga pagtagad ang kabahin sa mga dagkong negosyante sa Panglao apan dili rehistrado sa BIR ang resibo nga gina-issue ngadto sa mga customers niini.

Matud ni Aumentado, sa iyang Facebook post, nga daghang mga langyaw ang nagnegosyo sa Panglao apan walay resibo.

Agosto 27, mibisita sa buhatan sa Gobernador ang Revenue District Officer sa BIR-Bohol nga si Debbie Angeles V. Garcia, ARDO nga si Emma S. Alabat uban sa usa sa mga examiner nga si Mr. Jaime S. De Guzman, alang sa usa ka dayalogo kabahin sa nahisgutang isyu nga adunay mga langyaw nga kusog ang negosyo sa Panglao, apan dili rehistrado sa BIR ang resibo niini.

Buot masiguro ni Gobernador Aris Aumentado nga ang mga negosyante, ilabina ang mga operators sa mga hotels ug resorts lokal man o langyaw, compliant usab ngadto sa BIR pinaagi sa pagbayad sa saktong buhis sa ilang negosyo ug pagbaton sa rehistrado nga resibo gikan sa BIR. Tumong sa Gobernador nga patas ang pagpatuman sa balaod langyaw man o lokal nga negosyante.

Si Angeles mibutyag nga ang surveillance team sa BIR nakasakop og usa ka langyaw nga negosyante, diin dili rehistrado sa BIR ang resibo nga ginahatag sa mga customers ug dili usab rehistrado ang cash register machine niini.

Uban sa Provincial Administrator Asteria Caberte, gipadangat ni Aumentado ngadto sa BIR nga gikinahanglan ang pagmugna og usa ka aktibo nga Task Force nga maoy maglihok ug mututok sa pagsubay sa tanang mga negosyante sa Panglao ug sa tibuok probinsya.

Nasayran nga adunay mga resorts nga wala magbayad sa BIR sa naandan nga balayranan matag tuig gumikan kay branch lamang kini ug centralized ang maong negosyo, busa ang main office mao ang nangabaga sa tanang balayrunon.

Pagdugang ni Angeles sa Oslob ug Talisay adunay kooperasyon ang mga hingtungdan nga buhatan.

Kini nagkanayon nga partikular sa Talisay, adunay kompleto nga talaan ang buhatan sa turismo sa mga mingsulod sa ilang dapit nga mga turista, kung pila ka mga rooms ang maka-accomodate sa mga turista ug kung tagpila ang rates niini.

Si Angeles namahayag nga kinahanglanon usab sa buhatan sa turismo sa kalungsuran sa Bohol ang pagbaton og sama sa talaan nga gihimo sa Talisay.

Si PA Aster, isip Assistant Secretary kaniadto sa Department of Trade and Industry(DTI), mipasubang nga gikinahanglan ang panaghiusa sa BIR, DTI, ug sa lokal nga turismo alang sa mas epektibo nila nga pagserbisyo, ilabina sa local licensing unit.

Ang BIR-Bohol mikomitar sa pagresponde subay sa hangyo sa Gobernador og nga mas pakusgan ang mga inisyatibo alang sa hipno nga koleksyon sa BIR.PIMO/ALT