5 KA PAMILYA NAKADAWAT OG BALAY GIKAN KANG GOV. ARIS, CONG. VAN-VAN AUMENTADO UG BPPO

Gipadangat sa mga benepisyaryo sa programa nga Balay sa Paglaum ang ilang dako nga pasalamat ngadto kang Gobernador Erico Aristotle "Aris" Aumentado, ug sa iyang kapikas sa kinabuhi nga representante sa Segundo Distrito, Congresswoman Van-van Aumentado, human ang tagsa-tagsa kanila, pormal nga midawat sa gihatag ngadto kanila nga balay, pinaagi sa ceremonial turn-over nga gipahigayon didto sa mga hingtungdang dapit, Septyembre 21.

Ang Balay sa Paglaum usa ka personal nga adbokasiya sa magtiayong Aumentado diin ang mga benepisyaryo niining adlawa, mao sila si Precentacion Tabigue, usa ka bakol sukad nahimugso, 85 anyos ang panuigon ug lumulupyo sa Barangay Poblacion, Bien Unido, Timoteo Alcunira, balo, 90 anyos ang panuigon nga taga Barangay Mandawa, Bien Unido, Teodoro ug Juana Dasoc sa Barangay Casate, Ubay, Carlos ug Roselyn Pilongo sa Barangay Gov. Boyles, Ubay ug Roberto uban kang Esidora Zapanta lumulupyo sa Barangay Buenavista, Ubay.

Sa mensahe nga gipadangat sa Gobernador, atol sa seremonyas sa pagtugyan sa balay ngadto sa pamilya Zapanta didto sa Barangay Buenavista, Ubay, kini miiingon, "Atong pasalamatan ang atong Labaw'ng Makagagahom nga gihatagan kita og instrumento nga makatabang pagpahiluna sa atong gustong mahitabo sa atong mga kaigsoonang kabos. Kay bisan pa'g naa mi financial assistance nga ikahatag pagtukod sa balay, di gyod na magmalampuson kung wala kita'y katabang."

Si Congresswoman Van-van sa iyang bahin nagkanayon, "Personal adbokasiya namo kini ni Gov. Aris gamit ang among personal nga pondo. No government funds involved, ug mao nga naka-jibe namo ang kapulisan kay naa pod sila ani nga mga programa."

Ang magtiayong Aumentado determinado sa pagtabang sa mga anaa sa ubos nga hut-ong sa katilingban dili lamang pinaagi sa pagserbisyo, kundili apil niini ang pagpaambit sa mga grasya nga ilang nadawat.

Kini ang hinungdan sa ilang pagpanghatag og balay pinaagi sa ilang adbokasiya nga Balay sa Paglaum pondo gikan sa ilang personal nga panudlanan.

Kahinumduman nga ang kasamtangan nga Provincial Director sa Bohol Police Provincial Office (BPPO) nga si PCOL LORENZO A. BATUAN, milusad sa nakalabay nga tuig, sa programa sa BPPO nga Libreng Alagad ug Balay.

Kung adunay muabot nga donasyon, ang kapulisan boluntaryo nga mutukod og panimalay para sa mga benepisyaryo nga nakapasar sa ilang kriterya.

Kasamtangan nga adunay 33 ka mga panimalay ang natukod na sa mga kapulisan sa lalawigan sa Bohol ug 27 niini ang gigastuhan sa magtiayon nga Aumentado, diin labing menos P80,000 ang kantidad sa matag panimalay.

Matud pa ni Gobernador Aris nga aduna pa'y daghan nga tukuron ang BPPO, gumikan kay nakahatag na kini ngadto sa kapulisan, sa gikinahanglang pondo.

Pagdugang ni Aumentado, sa sunod tuig mupili ang BPPO matag quarter og 13 ka pamilya, nga magagikan sa tulo ka distrito, aron mao ang tukuran og balay.

Gipasalamatan sa magtiayong Aumentado ang mga pribadong indibidwal nga mitambayayong sa proyekto ug ang BPPO pinanguluhan ni Batuan, uban kang PLTCOL Norman Nuez, ug sa mga chief of police sa Bien Unido ug Ubay, mga opisyales sa kabarangayan, ug ni Board Member Jamie Aumentado Villamor, gumikan sa ilang mainitong pagsuporta sa kalihukan karong adlawa.

Si PCOL Batuan sa iyang bahin nagkanayon nga ang kalampusan sa ilang programa nga Libreng Alagad ug Balay, bunga sa abtik nga responde sa mga Aumentado alang sa maong proyekto, ug sa aktibo nga partisipasyon sa komunidad.

Ang Libreng Alagad ug Balay ug ang Balay sa Paglaum nga adbokasiya sa magtiayong Aumentado, nagapasundayag sa gahom sa Filipino Bayanihan, paghiusa ug pagtabang sa mga nanginahanglan nga mga Bol-anon.PIMO/ALT