GOBERNADOR SA BOHOL UG CEBU NAGHIUSA SA SUROY SUGBO SOUTHERN HERITAGE TRAIL

Miarangkada na ang mga lakang sa gipakusgan nga Sisterhood Agreement tali sa Bohol ug Sugbo, nga mas nailhan isip SugBohol nga Rehiyon.

Naghiusa si Gobernadora Gwendolyn Garcia ug Gobernador Aris Aumentado sa pagpasundayag sa unang adlaw sa Suroy Suroy Sugbo Southern Heritage Trail, nga gipasiugdahan sa Kagamhanang Probinsyal sa Sugbo ubos sa liderato ni Gobernador Gwen Garcia.

Ang maong kalihukan kabahin sa tulo ka adlaw nga Tourism Caravan nga gipahigayon sa Probinsya.

Pito ka munisipalidad ang gibisita sa grupo nga gipanguluhan ni Garcia uban sa pinasidunggang mga bisita niini nga sila si Senador Francis Tolentino ug Bohol Gobernador Erico Aristotle "Aris" Aumentado uban sa mga bokal sa Bohol, nga sila si Atty. Jamie Aumentado Villamor ug Lucille Lagunay, ang Hepe sa Bohol Provincial Tourism Office (BPTO) Joanne Pinat ug Hepe sa Center for Culture and Arts Development (CCAD) Emerson Pinos.

Gipahigayon ang Suroy Suroy Sugbo Southern Heritage Trail Kick Off sa Munisipalidad sa Minglanilla, Nobyembre 22, adlaw'ng Byernes.

Uban sa Munisipalidad sa Minglanilla nga gipanguluhan ni Mayor Rajiv Enad, ug sa tibuok koponan ni Garcia, gilusad ang Joint Opening sa Municipal Sports Meet ug ang Suroy Suroy Sugbo Southern Heritage Trail 2024. Misaksi usab si Garcia, Tolentino ug Aumentado sa Sugat-Kabanhawan Festival sa Minglanilla.

Ang Munisipalidad sa San Fernando mao ang ikaduhang destinasyon sa Tourism Caravan, diin mipatighulog kini sa San Isidro Labrador Church ug gipasundayag sa LGU-San Fernando ang ilang lamian nga pagkaon, mga matahom nga mugna sa sining ug bunga sa kultura. Giabi-abi ni Mayor Mytha Ann Canoy ang koponan.

Sa laing bahin, naghimo na usab og mga pangaliya ang tanan didto sa matahom nga simbahan sa Nuestra Señora del Pilar, Sibonga, samtang gi-abiabi sila ni Mayor Mariano Dotis Laude ug mga opisyales sa LGU-Sibonga. Kini mao ang ikatulong dapit sa tourism caravan.

Sa Argao, Cebu ang ika-upat nga Suroy Suroy Sugbo diin giabi-abi ni Mayor Allan Sesaldo ang grupo ni Garcia.

Gipasundayag usab sa Argao, ang ilang pinasahe nga panagsayaw, lamian nga pagkaon ug talagsaon nga panagway sa pagkabalaan sa ilang simbahan.

Ang Munisipalidad sa Dalaguete nga gipanguluhan ni Mayor Ronald Allan Cesante, mao ang ikalimang destinasyon sa Tourism Caravan. Ang San Guillermo de Aquitania Parish Church usa sa ilang gipasibantog sa ilang dapit. Aduna usab sila'y Museyo nga didto makita ang mga sinaunang kubyertos sa Dalaguete.

Ang Alcoy, Cebu diin ika-unom nga gibisita sa Suroy Sugbo, nagpasundayag sa ilang Siloy Festival. Giabi-abi sila ni Mayor Michael Angelo Sestoso.

Katapusang gibisita sa unang adlaw sa Tourism Caravan, mao ang Munisipalidad sa Boljoon nga gipanguluhan ni Mayor Jojie Derama.

Nagpahigayon og pagpangaliya ang grupo, didto sa Patrocinio De Maria Parish Church. Abri sa publiko ang mga karaang koleksyon sa Boljoon kabahin sa mga basahon, kubyertos ug mga kabtangan.

Si Gobernador Aris Aumentado, nagkanayon nga maayo ang programa ni Garcia kabahin sa turismo, "We can see that this program is a noble one. We are looking to replicate this program with the guidance of the very good Governor Gwen Garcia now that Region 7 is called SugBohol, and magtinabangay gyod mi, ang atong duha ka Probinsya."

Sa laing bahin, si Garcia mihatag sa mainitong pagtimbaya ngadto sa Gobernador sa Bohol, Gov. Aris Aumentado atol sa katapusang destinasyon sa Tourism Caravan nianang adlawa.

Si Garcia mipahibalo nga ang Bohol ug Sugbo nalang ang nahibilin sa Rehiyon7 human nagmugna ang Negros og ilang kaugalingon nga Rehiyon diin gitawag kini og Negros Island Region (NIR), samtang uban kanila ang Probinsya sa Siquijor.

Mipasubang si Garcia, nga dili angay masubo bisan tuod kung Bohol ug Cebu nalang ang nahibilin nga probinsya sa Central Visayas Region gumikan kay kini usa ka oportunidad sa mas labing maayo nga mga butang.

Pagdugang ni Garcia, ang kanhi Rehiyon 7 Central Visayas paga-ilhon nga SugBohol Region. "Gov pinagbuklod ng tadhana, magsama-sama tayo Cebu and Bohol," matud ni Gobernador Gwendolyn Garcia. (PIMO/ALT)