Emosyonal nga mihatag sa mensahe si Evangelita Sajul, usa sa upat ka benepisyaryo sa Balay sa Paglaum, atol sa pormal niini nga pagdawat sa maong balay, pinaagi sa gipahigayon nga seremonya sa pagtugyan niadtong Enero 28, didto sa Barangay Kinagbaan, Jagna, Bohol.
"Gov, ma'am, salamat at binigyan nyo ako ng bahay. Tatanawin ko ito na utang na loob sa inyo, habang ako’y nabubuhay. Di ko kayo malilimutan," matud ni Sajul.
Ang maong benepisyaryo- 75 anyos, byuda, adunay pito ka mga anak apan walay bisan usa sa maong mga anak nga nanumbaling pagbisita o pagsubay kaniya taliwala sa iyang masakiton nga kahimtang ug gubaon nga pinuy-anan.
Upat ka benepisyaryo ang nakadawat nianang adlawa og balay gikan sa adbokasiya ni Gobernador Erico Aristotle Aumentado ug Kongresista Van-van Aumentado nga Balay sa Paglaum uban sa programang Libreng Alagad ug Balay (LAB), sa Bohol Police Provincial Office (BPPO), nga sila si Cristobala Lozada, 63 ang panuigon, lumulupyo sa Cabad, Balilihan (ika-44 nga nakadawat og balay); Jimmy Ibañez, sa Zamora, Bilar (ika-45); Evangelita Sajul sa Kinagbaan, Jagna (ika-46) ug Reynaldo uban kang Jasmine Gudito sa East-Lungsodaan, Garcia Hernandez, Bohol (ika-47 nga nakaangkon og balay).
Si Aumentado nagkanayon nga ang tumong sa ilang personal nga adbokasiya uban sa iyang kapikas sa kinabuhi, dili lang aron kahatagan og hamugaway nga balay ang katawhan nga walay igong kapasidad pagbaton sa nag-unang mga panginahanglan sama sa tambal, pagkaon ug kapasilungan.
Tumong usab niini nga bag-uhon ang imahe ug pagtan-aw sa publiko ngadto sa mga kapulisan tungod matud ni Aumentado nga ang mga pulis dili taman lang sa paggunit ug paggamit sa armas aron pagpatunhay sa kalinaw sa komunidad.
Ang kapulisan nahigugma sa iyang isigkataw, ug andam mualagad pinaagi sa pagtukod og balay, alang sa mga benepisyaryo.
Sa laing bahin, gipasalamatan sa Gobernador ang mga opisyales sa barangay sa makugihon nga suporta niini ngadto sa inisyatibo sa kapulisan ug sa Balay sa Paglaum.
Misaad ang Gobernador sa paghatag og dugang P200,000 nga ayuda gikan sa Buhatan sa Gobernador para sa ilang priority projects isip pahalipay sa barangay sa ilang pagsuporta ngadto sa ilang konstituwente nga nanginahanglan og balay.
Pagdugang ni Aumentado, kung mahuman na pagtukod ang tanan sa 145 ka balay nga naaprobahan ang pondo sa tuig 2024, mas daghan ang balay nga aprobahan ang pondo para sa tuig 2025 kay nagkadaghan ang mga nagboluntaryo paghatag og suportang pinansyal.
Paghinubay sa Hepe sa Provincial Community Affairs and Development Unit (PCADU), nga si PltCol Norman Nuez, kini mipasabot nga sa ilang programa nga LAB, naggahin sila gikan sa personal nila nga kita aron makatukod og balay para sa nanginahanglan. Sa dihang nakahatag na sila og unom ka balay, miduol ang kapulisan ngadto sa First Couple aron pangayuon ang suporta sa duha kabahin ning maong programa.
Gilusad sa magtiayon ang unang suportang pinansyal alang sa tulo ka balay sa kantidad nga P70,000 matag usa, apan gibati sa magtiayon ang talagsaon nga kalipay nga nakapaambit sila gikan sa ilang personal nga panudlanan sa mga grasya nga ilang nadawat busa ila kining gipadayon hangtod karon.
Matud ni Nuez nga sa buwan sa Abril, magduha na ka tuig ang aktibo nga partnership tali sa mga kapulisan ug sa first couple, paghatod og paglaum ngadto sa mga nakabsan sa pagtuo ngadto sa gobyerno o sa mga konstituwente nga nahisulod sa mga lungsod nga nakit-ang mas grabe ang kapobrehon (poverty incidence).
Kauban sa mga misuporta nianang adlawa sa kalihukan pinaagi sa ilang presensya, mao si Board Member Lucille Lagunay sa Balilihan, Mayor Norman Nuez sa Bilar, mga volunteers sa Balay sa Kabos didto sa Jagna, si Vice Mayor Antonia Ladaga sa Garcia Hernandez ug ang mga opisyales sa matag barangay nga gipuy-an sa mga hingtungdang benepisyaryo. (PIMO/ALT)
No comments:
Post a Comment