Sa pagbisita ni Presidente Ferdinand R. Marcos Jr. sa Sugbo, atol sa gipahigayon nga Regional Development Council (RDC) Meeting, ning adlaw'ng Huwebes, Enero 30, didto sa DepEd Ecotech Center , Lahug, Cebu City, gipakita sa mga gobernador ug sa mga mayores sa Rehiyong Kabisayaan ang tibuok nga suporta ngadto sa Pangulo pinaagi sa ilang personal nga presensya sa nahisgutang panagtagbo.
Ang Presidente kinsa gitakda nga mutambong sa upat ka kalihukan sa Sugbo nianang adlawa, sa pagpangulo ni Gobernadora Gwendolyn Garcia, kuyog niini ang mga membro sa iyang Kabinete.
Sa RDC meeting, gihisgutan ang mga kalamboan bahin sa mga dinagko nga proyektong pang-imprastraktura sa Sugbo sama sa Cebu Bus Rapid Transit, New Cebu International Container Port, Consolacion-Liloan Bypass Road, New Cebu-Mactan (4th) Bridge and Coastal Road, ug Metro Cebu Expressway.
Gituki usab ang dagko nga mga proyekto sa ubang mga probinsya sama sa Celestino Gallares Multi-Specialty Medical Center sa Bohol, New Dumaguete Airport Development sa Dumaguete ang Upgrade and Expansion of Bohol-Panglao International Airport, ug ang Panglao-Tagbilaran Offshore Bridge Connector sa Bohol, ug ang Siquijor Airport Development sa Siquijor.
Si Gobernador Erico Aristotle Aumentado isip, Chairman sa RDC, positibo ang panglantaw nga ang matag probinsya nga miduso sa ilang tagsa-tagsa ka mga proyekto, makabaton sa kalampusan sa ilang panginahanglan.
Kahinumduman, nga gipanguluhan ni Gobernador Aumentado ang gipahigayon nga Provincial Development Council (PDC) meeting sa lalawigan sa Bohol ning buwan sa Enero tuig 2025, ug gi-endorso niini ngadto sa RDC-7 ang pagpahigayon og feasibility study sa proposed Metro Bohol. Apil sa maong proyekto nga Metro Bohol ang pagtiwas sa Panglao-Tagbilaran Offshore Bridge Connector.
Sa presentasyon ning adlawa ngadto sa RDC sa nahisgutang proyekto nga Panglao-Tagbilaran Offshore Bridge Connector, aduna kini budget cost nga P6.96 billion (ODA-AFD) ubos sa Department of Public Works and Highways. Kini adunay mga kakulian sa pagtrabaho gumikan sa kalangan sa pagpagawas sa pondo niini.
Matud pa nga kung anaa na ang igo nga pondo niini paspasan sa DPWH ang pagtrabaho sa main bridge structure aron mas dali kini nga kapahimuslan sa publiko.
Subay sa tigom nga gitambongan ni Gobernador Aris, uban ang Pangulong Marcos, ang French Government, andam nga pondohan ang maong proyekto aron makompleto ang pagtrabaho niini.
Samtang sa laing bahin ang proyekto nga Upgrading, Expansion, Operation, and Maintenance of the Bohol-Panglao International Airport (BPIA) ubos sa Department of Transportation (DOTr) adunay budget cost nga P4.53 billion pinaagi sa Public Private Partnership (PPP).
Giaprobahan sa NEDA Board ang terms and conditions sa maong proyekto Hulyo 15, 2024 ug Nobyembre 18 gi-isyu ngadto sa Aboitiz InfraCapital, Inc. ang notice of award niini. Pormal nga gilagdaan ang Concessionare Agreement sa maong proyekto Disyembre 18, 2024 ug target nga sugdan sa Infrastructure A7C Corporation ang operasyon ug pagdumala sa BPIA Hunyo 16, 2025.
Ang Celestino Gallares Multi-Specialty Medical Center, nga nahimutang sa Old Mills Road, Malayo Sur, Cortes ug adunay budget cost nga P3.67 billion ubos sa Department of Health, gikataho nga adunay kalangan sa proyekto gumikan sa DBM Regional Advisory No.2024-12. Aksyon sa RDC nga muhangyo ngadto sa DBM nga tun-an ang implikasyon sa maong Regional Advisory kabahin sa proseso pagbayad sa mga kontraktor aron kalikayan ang pagkalangan sa proyekto ug aron makuha ang target nga implementasyon sa tuig 2019-2025.
Ang RDC meeting gitambungan sa RDC full council officials ug gipanguluhan ni Gobernador Aumentado, uban sa NEDA VII Regional Director Jennifer Bretaña, RDC Co-Chairman Kenneth Cobonpue, ug Cebu Governor Gwendolyn Garcia, ubos sa pagdumala sa Pangulo.
Si Presidente Marcos mipasabot ngadto sa tanang mga opisyales nga mitambong sa mga kalihukan sa Pangulo nianang adlawa, kung unsa ka mahinungdanon nga tun-an ug planuhon ang gitinguha nga proyekto, siguraduhon nga matiwas ang gisugdan nga proyekto ug kinahanglanon nga ang maong mga proyekto kapahimuslan sa sunod nga mga henerasyon.ALT
No comments:
Post a Comment