Gipanguluhan ni Gobernador Erico Aristotle Aumentado ang pagpirma didto sa Kapitolyo sa Memorandum of Agreement (MOA) uban sa Small Business Corporation (SBCorp), nga girepresentahan nila ni Lourdes Baula, Senior Vice Pres. Finance ug Wally Dong Calderon, hepe sa Innovation and Advocacy Group, isip lehitimo nga kapartner sa Kagamhanang Probinsyal pagpadangat sa mga tabang pinansyal ngadto sa Micro Small Medium Enterprises(MSME), adlaw’ng Lunes Disyembre 1, 2025.
Si Aumentado nga naila sa political will niini pagpaabante sa mga anaa sa grassroots sector, pinaagi sa mga livelihood projects ug daghang trabaho gikan sa mga naimbitahang investors, buot masiguro nga makabaton og easy access sa ilang pinansyal nga panginahanglan ang mga gagmay’ng negosyante nga anaa sa mga rural areas, ug lambigit sa agrikultura sama sa mga mag-uuma.
Ang SBCorp kansang presidente mao si Robert Bastillo, usa ka non-bank government owned and controlled corporation diin kini usa ka institusyong pangpinansyal ubos sa pagdumala sa Department of Trade and Industry (DTI) MSME Development Council, gihuptan ang mandato pagtabang sa mga MSMEs.
Apil sa mga programa sa SBCorp mao ang Corporate Funded Programs sama sa regular retail lending para sa mga rehistradong MSMEs ug venture capital program para sa selected start-up MSMEs pinaagi sa partner nga state universities and colleges isip usa ka national government-supported program.
Apil usab niini ang Enterprise Rehabilitation Financing alang sa mga nagkalisod nga negosyo gumikan kay apektado sa kalamidad ug ang Pondo sa Pagbabago at Pag-asenso (P3) alang sa mga aktibong negosyante.
Pinaagi sa “Magna Carta for Small Enterprises" kun R.A. 6977 amended as R.A. 8289 ug R.A. 9501 Section 13 "Magna Carta for Micro, Small and Medium Enterprises,” abli ang SBCorp sa pagpadangat sa serbisyo ngadto sa mga MSMEs.
Matud sa Bohol Economic Development and Investment Promotion Office (BEDIPO), pinaagi sa ilang hepe Ma. Fe Dominise, kinsa mao ang gitahasan ning kalihukan, nga dul-an 1,000 na ang natabangan sa SBCorp pinaagi sa work station niini sa Kapitolyo.
Si Provincial Administrator Asteria Caberte, kanhi DTI Assistant Secretary, milakbit-saysay nga 98.9% sa total business sector sa nasod mao ang MSMEs diin 99.8% niini mga micro o gagmayng negosyante.
Matud pa nga tumong sa gobernador sa maong MOA nga opisyal nga katabangan ang mga micro entreprenuers nga mapalambo ang ilang mga kapanginabuhian ug kahatagan kini og dapit sa Business One Stop Shop (BOSS).
Kauban usab sa maong kalihukan si DTI Provincial Director Vierna Ligan, Francisco Buenavides sa SBCorp, Bise Gobernador Nick Besas Jr., Bokal Mutya Kismet Tirol, Vice Chair SP Committee on Trade and Industry, PCDO Head Maria Conrada Fuentes ug OPA-Assistant Provincial Agriculturist Larry Pamugas.(PIMO/ALT)
No comments:
Post a Comment