Nagpahigayon og courtesy visit ang mga opisyales sa AppleOne Group, Inc. ngadto kang Gobernador Erico Aristotle Aumentado didto sa Kapitolyo Disyembre 1, 2025, ug ilang gipresentar ang kinatibuk-ang development plan sa pagtukod sa JW Marriott Hotel and Residences sa Bingag, Dauis.
Ang maong property nahimutang usa ka kilometro ang gilay-on gikan sa Hinagdanan Cave sa maong barangay sa Dauis.
Kauban ni Gob. Aumentado pag-abiabi kanila si Provincial Administrator Asteria Caberte, Provincial Legal Officer Atty. Handel Lagunay, ug Chief of Staff Atty. Filipina Piollo.
Gipahibalo ni Myra Lynn Gilig, Senior Vice President sa AppleOne Group, Inc., uban kang Lorelie Racuya, Assistant Vice President, ug Atty. John Patrick Cabrera isip legal counsel sa Apple One, nga target sa JW Marriott nga mahuman kini sa tuig 2028.
Ang maong luxury resort and spa anaa nalangkob sa 7 ka ektarya nga luna diin adunay 70 ka residential units ug 80 ka standard nga guestrooms and suites.
Aduna sab function rooms, grand ballroom, all dining and specialty restaurants, lobby lounge with cafe and destination bar, spa and JW Garden, ug adunay ipahigayon nga mga recreational activities nga maghatag og dugang atraksyon sa maong dapit ngadto sa mga turista ug sa mga buot mu-okupar niini.
Matud pa nga 60% sa maong dapit limestone-based ang yuta nga giprotektahan sa natural rock formation taliwala sa puti nga balas niini, diin committed ang JW Marriot nga ipabilin ang maong porma sa straktura sa baybayon, isip kabahin sa ilang commitment nga panalipdan ang kalikopan bisan pa man sa konstruksyon sa proyekto.
Ang mamahimong bakante nga lote niini pagatamnan sa 900 ka nagkadaiyang species sa mga kahoy ug mga tanom, diin matud pa ang mga sangkap sa pagpangluto diha sa hotel niini sama sa mga herbs ug utanong dahon-dahon pagakuhaon diha ra usab sa maong mga pananom isip kabahin sa secret garden landscapes.
Gihisgutan nga sentro sa inspirasyon sa desenyo sa JW Marriott ang naila nga asin tibuok nga giila isip Geographical Indication (GI) sa Bohol ug ang Napaling Corals sa Panglao Island.
Lakip sa mga consultants sa JW Marriott mao ang Deep Earth Geotechnical and Environmental Consultancy Company, uban ang Development Management Group Co. Ltd. sa Thailand.
Sa laing bahin, nasayran nga ang Marriott Bonvoy community adunay kapin sa 10 million nga membro, ug ang JW Mariott sa Bohol, maoy una sa tibuok nasod diin oportunidad kini pag-posisyon sa lalawigan nga usa sa mga inila nga dapit sa internasyonal nga turismo.
Ang initials nga JW sa JW Marriott nagrepresentar sa pangalan sa founder sa Marriott Corporation nga si John Willard diin na-establisar ang maong brand tuig 1984.
Mapasalamaton ang gobernador sa pagbisita sa mga opisyales sa AppleOne Group ug giawhag niya kini sa pag-invest og business hotel sa old airport ug sa Business Process Outsourcing (BPO).
Matud pa nga sa dihang makabaton og properties ang Marriott company sa Bohol, sinugdanan lamang kini sa dugang pang mga development nga ipahiluna sa kompanya nganhi sa Bohol.
Gawas sa dakong oportunidad sa mas buhi nga turismo, ang operasyon sa JW Marriott sa Bohol, maghatag og daghang trabaho ngadto sa mga Bol-anon ug magdugang sa pagpalambo sa ekonomiya sa lalawigan.
Isip usa ka UNESCO Global Geopark, ang JW Marriot posible nga usa ka kahigayonan sa mas gipakusgan nga pagpasundayag sa kabilihon sa pag-amuma sa kinaiyahan, bisan pa man sa padayong paglambo sa turismo, taliwala sa modernisayon ug teknolohiya. (PIMO/ALT)
No comments:
Post a Comment