Duha ka proyektong kalsada ug school building ang pormal na nga gi-turn over ngadto sa mga lumulupyo sa Dauis, Nobyembre 29, 2025 adlaw'ng Sabado, human gipanguluhan ni Gobernador Erico Aristotle Aumentado ang ribbon cutting sa Mariveles-Totolan Road ug ang turnover of documents niini uban ang sa Mayacabac-Poblacion Road ug ang ribbon cutting sa school building sa Bingag Elementary School, Bingag, Dauis.
Malipayon nga gidawat sa mga magtutudlo ug ginikanan sa Bingag Elementary School ang one-storey 2 classroom school building, pinaagi sa School Principal nga si Julius Ranises ug ni Kapitan Ricardo Pojas.
Gi-implimentar kini sa Provincial Engineering Office (PEO) sa kantidad nga P3,890,000 pondo gikan sa Special Education Fund (SEF).
"Ang proyekto usa ka buhing saksi nga ang buhis sa katawhan nahitunong sa maayong programa para sa edukasyon kay ang kaugmaon sa kabataan mao ang atong gilantaw," matud ni Gobernador Aumentado.
Sa laing bahin kuyog kang Gobernador Aumentado atol sa ribbon cutting ceremony sa Mariveles-Totolan Road si Bise Gobernador Nick Besas Jr., ang tulo ka kapitanes sa Barangay Mariveles, Totolan ug Mayacabac nga sila si Kap. Quiliano Clarin, Kap. Benjamin Humol ug Kap. Roberto Bongalos uban ang ilang mga membro sa sangunian, ang mga opisyales sa Munisipalidad sa Dauis pinanguluhan ni Mayor Marietta Sumaylo, ug ang mga empleyado sa PEO.
Nagkantidad og P30-Milyones ang Mayacabac-Poblacion Road samtang P10-Milyones ang Mariveles-Totolan Road.
Mipadangat ang tulo ka kapitanes sa mensahe sa pasalamat ngadto sa administrasyon tungod mapahimuslan na sa katawhan ang giinagurahan nga mga kalsada.
Dako ang mga pagpasalamat ni Mayor Sumaylo nga gipanghingusgan gyod sa Gobernador kun gi-fight gyod ni Aumentado nga mapahiluna ang pagpatrabaho sa mga nahisgutang kalsada gumikan kay usa kini sa mga mahinungdanong agianan sa Dauis.
Gipasalamatan usab sa mayora ang suporta sa mga tag-iya sa yuta pinaagi sa pagpahigayon og deed of donation alang sa malampuson nga implementasyon sa proyekto.
Si Aumentado miingon nga ang mga kalsada dugay na gayod gilauman sa katawhan nga masemento. Milabay ang mga gobernador nga nagpabiling pangandoy ang pagpasemento sa maong mga kalsada.
Mapasalamaton si Aumentado sa pagpahiluna ni Sumaylo diin gipadayon ni kanhi mayor Bullen ug gitiwas karon sa termino na usab ni Sumaylo ang proyekto pinaagi sa PEO.
Sa Administrasyon ni Aumentado hugot niini nga gipatuman ang limpyong pang-gobyerno kontra korapsyon ug gisiguro niini nga ma-implementar ang mga proyekto sa Kagamhanang Probinsyal.
Kahinumduman nga ang Bohol bag-uhay lang nakadawat sa pasidungog niadtong Nobyembre 26 sa Manila Hotel, gikan sa DILG nga Exemplar Awards ug usa sa top national finalist sa SubayBAYANI Awards gumikan sa maayo nga pagdumala sa mga proyektong pang-imprastraktura ubos sa liderato ni Gobernador Aumentado..PIMO/ALT
No comments:
Post a Comment