Sa ikaduhang higayon, gipasidunggan sa DILG ang Bohol sa liderato ni Gobernador Erico Aristotle Aumentado, nga modelo sa pagpatuman sa mga proyekto sa Gobyerno, atol sa gipahigayon nga national awarding ceremony sa SubayBAYANI Awards, didto sa Manila Hotel, Nobyembre 26, 2025.
Ang National SubayBAYANI Awards gi-establisar sa Department of Interior and Local Government (DILG) tuig 2021, isip pag-ila sa mga Local Government Units (LGU) nga nakitaan sa ilang maayo nga pagdumala, ug kasaligan nga pagpatuman sa mga pang-imprastrakturang Locally-Funded Projects (LFPs) uban ang participatory governance, citizen engagement, transparency ug accountability.
Pinaagi sa national platform nga SubayBAYAN portal, gi-monitor ang mga proyekto sa Local Government Units, ug ang maong mga LGUs mipailalom sa makuti nga screening ug on-site validation.
Kini, aron masuta kung nagsubay ba sa mga lagda sa estriktong pagpatuman sa mga proyekto ang mga LGUs sama sa sakto nga paggamit sa pondo, abri ba kini sa publiko ug kung aduna ba'y impact ang proyekto ngadto sa komunidad.
Personal nga gitambungan ni Pangulong Ferdinand "Bongbong" Marcos Jr. ang awarding ceremony.
Gipadangat sa presidente ang mga pagdayeg ngadto sa tanang mga awardees ug gidasig kini sa padayon nga pagpakita nga ang publiko makasalig sa mga alagad sa gobyerno.
"Kayo po ang magandang halimbawa na matatag pa rin ang puso ng serbisyo publiko sa ating bansa," matud ni Pangulong Marcos.
Taliwala sa mga kaprobinsyahan sa Pilipinas, usa ang Kagamhanang Probinsyal sa Bohol sa pipila nga gipasidunggan sa exemplar awards uban sa City Government of Tagbilaran, Municipality of Buenavista ug Municipality of Loay.
Gawas sa Exemplar Awards, top national finalists usab ang Provincial Government of Bohol para sa Provincial Category ug ang Tagbilaran City sa City Category.
Malipayong gidawat ni Gobernador Aumentado ang mga pasidungog gikan sa Kagamhanang Nasyonal.
Mapasalamaton ang Gobernador ngadto sa National Government, ilabina sa DILG sa kanunay nga pagsalig, ug pagsuporta sa probinsya sa Bohol sa commitment niini ngadto sa usa ka hingpit nga local governance ug innovative approaches sa kalamboang pang-imprastraktura.
Gi-dedikar sa Gobernador ang maong mga Awards ngadto sa Kagamhanang Probinsyal ug sa katawhang Bol-anon uban ang pagpasalamat ngadto sa mga hingtungdang buhatan sama sa Provincial Engineering Office (PEO) ug Provincial Planning and Development Office (PPDO) sa ilang determinasyon ug dedikasyon sa pagserbisyo.
"Ilhanan kini nga nakita sa nasudnong Pangagamhanan ang atong mga paningkamot alang sa insaktong pagpatuman sa mga infrastructure projects, kauban ang estriktong pag-monitor sa maong mga proyekto," matud ni Aumentado.
Kahinumduman nga tuig 2024, giila usab ang Probinsya sa Bohol nga exemplar sa pag-implementar sa mga proyektong pang-imprastraktura.
Ang SubayBAYANI Awards 2025 ubos sa pagdumala sa DILG pinaagi sa Office of the Project Development Services (OPDS), sa liderato ni DILG Secretary Juanito Victor Remulla. ALT
No comments:
Post a Comment