BOHOL GOV. AUMENTADO MAPASALAMATON SA GAWAD KALASAG SEAL OF EXCELLENCE GIKAN SA NDRRMC

Gidawat ni Gobernador Erico Aristotle Aumentado ang pasidungog sa lalawigan nga 2023 Gawad KALASAG Seal of Excellence (Beyond Compliant) category atol sa gipahigayon nga tigum sa National Disaster Risk Reduction and Management (NDRRM) Council.

Ang pasidungog gidawat ni Aumentado isip chairman sa Provincial Disaster Risk Reduction Management Council (PDRRMC) sa tigum nga gihimo Disyembre 11 sa Manila Hotel.

Mismong sila si Kalihim Gilberto Teodoro sa Department of National Defense ug Kalihim Benjamin Abalos sa Department of Interior and Local Government ug Undersecretary Ariel Nepomuceno sa Office of Civil Defense (OCD) nga mao usay executive director sa NDRRMC ug chairman sa National Gawad KALASAG committee ang mitunol sa pasidungog.

Giila ang Bohol sa kategoryang “Beyond Compliant” sa grado nga 2.50 sa Local Disaster Risk Reduction and Management Councils and Offices alang sa tuig 2023 subay sa gilatid nga sumbanan sa Philippine Disaster Risk Reduction and Management Act of 2010 nga mas nailhan isip R.A. No. 10121.

Matud pa, daku nga kabahin sa pag-ila ang ang dekalidad nga disaster risk reduction management ug humanitarian assistance sa PDRRMC ug sa Telephone and Radio System Integrated Emergency Response (TaRSIER) sa probinsya.

Nasayran nga ang Bohol nag-inusara sa tibuok Rehiyon 7 nga gihatagan sa maong pag-ila gumikan sa makusganon nga mga plano niini pagpanalipod ug paghatag sa mga serbisyong teknikal.

Giisip ni Aumentado nga dakong garbo ang maong pasidungog kay nagpamatuod lamang kini nga andam sa kanunay ang pangagamhanan pagpanalipod sa katawhang Bol-anon sa bisan unsang muabot nga katalagman.

Sumala sa buhatan sa OCD, ang konsepto nga Gawad KALASAG nagkahulugan og KAlamidad at Sakuna LAbanan, SAriling Galing ang Kaligtasan gisagop sa kagamhanan.

Pinasikad sa Strategic Change Agenda sa Aumentado-Balite nga administrasyon, doble ang paningkamot sa lalawigan aron panalipdan og maluwas ang katawhan nga nag-ungaw taliwala sa mga peligroso nga sitwasyon.

Namahayag si Aumentado atol sa maong pasidungog sa iyang pagdayeg ug pasalamat sa PDRRMO ug TaRSIER sa serbisyo niini ngadto sa komunidad pinanguluhan ni PDRRMO Anthony Damalerio.(PIMO/ ALT)