LIBRENG SERBISYO HATOD SA KAPITOLYO UG BPPO

Nakighiusa ang Kapitolyo ngadto sa Bohol Police Provincial Office (BPPO), sa gipahigayon nga PEACE Caravan, ngadto sa katawhan sa barangay Taytay, Loboc, Hulyo 15, uban sa pagsuporta ni Loboc Mayor Raymond Jala.

Medical Mission ang gitanyag sa Kagamhanang Probinsyal pinaagi sa Governor's Office Medical Outreach Unit (GO-MOU) pinanguluhan ni Dr. Arnold Cagulada uban ni Dr. Pedro Rosell ug mga kaubanan diin gipadangat ang serbisyo pinaagi sa libreng paghiling sa panlawas sa tanang residente nga misalmot sa medical mission ug gihatagan sa mga tambal ug bitamina ang mga nagkinahanglan niini.

Libreng tuli alang sa mga kabataan ang hatod nga serbisyo sa 21st Special Forces Company sa ilang pakig-alayon sa maong kalihukan, samtang libreng pagkaon alang sa tanang lumilihok ang gitanyag sa Loboc Police Station pinanguluhan ni PMAJ JESUS CASIPONG DAPLIN, Chief of Police.

Kauban usab sa BPPO ang Philippine Dental Association nga mao ang nanghatag og mga toothbrush ug toothpaste isip kabahin sa ilang dental awareness drive, ug ang Provincial Mobile Force Company (PMFC) pinanguluhan ni PLTCOL MARK GIFTER T. SUCALIT nagtanyag sa libreng arroz caldo ug tupi samtang libreng pa-ice cream ang dalit ni Provincial Director PCOL Lorenzo A. Batuan. Si PLTCOL NORMAN L. NUEZ Chief PCADU mao ang gitahasan nga tigpasayon ug tagdumala sa maong kalihukan.

Ang Delta Company 47th IB mitabang pagtukod sa balay nga proyekto sa Libreng Alagad ug Balay (LAB) diha sa Sitio Ensurik barangay Taytay, Loboc.

Gipanguluhan ni BATUAN ang ceremonial turn-over sa maong balay alang sa benepisyaryo nga si Orlando Ancog, 51 anyos ug adunay tulo ka anak.

Ang maong seremonyas pagtunol sa yawe usa sa mahinungdanong kabahin sa PEACE Caravan nianang adlawa.

Gisaysay ni Batuan nga ang pagkahimugso sa proyektong LAB, nahimong malampusong kabahin sa kalihukang pangkomunidad sa BPPO gumikan sa suporta ni Congresswoman Van-van Aumentado ug Gobernador Aris Aumentado pinaagi sa ilang adbokasiya nga Balay sa Paglaum. Ang Balay sa Paglaum sa mga Aumentado nagalihok pinaagi sa suportang pinansyal gikan sa ilang personal nga pondo, pagtukod og mga panimalay sa mga pamilya sulod sa tulo ka distrito, nga walay igo kapasilungan.

Gipakita ni Gobernador Aris Aumentado nga bisan sa iyang sibilyan nga kahimtang sa pagkakaron apan dili kini babag sa iyang pagpadayon sa iyang saad pagtabang sa mga taw nga nanginahanglan kay gikan sa kasingkasing ang iyang tinud-anay nga pagserbisyo ug kini usa sa iyang passion may posisyon sa gobyerno o wala.

Ang LAB nag-aghat sa komunidad pagtabang pinaagi sa ilang maarangang pinansyal o sa ilang kusog pagtukod og balay alang sa mas nanginahanglang pamilya.

Misuporta usab sa LAB ang Oro Integrated Cooperative, AFP/CAA, BFP, Bantay-Bayan sa Loboc, Barangay Opisyales sa Taytay ug si Cleopas Tac-an.

Ang maong panimalay mao ang ika-22 nga natukod sa BPPO. Ang mga Aumentado mihatag og pondo alang sa dugang 8 nga padayon ginatukod sa mga lungsod sa Tubigon, Sagbayan, Bien Unido, Loboc ug San Miguel samtang adunay laing pondo usab alang sa tulo ka panimalay sa Clarin.

Mitambong sa seremonyas pagtunol sa yawe sila si Executive Assistant Pableo Sumampong, ang mga barangay opisyales pinanguluhan ni Kapitan Alex Mandin ug ang mga nahimong kabahin sa proyekto.PIMO/ALT