MGA BYAHE SA GUGMA SA ADLAW SA PAGHIGUGMAAY

Gipadaplin usa ni Gobernador Erico Aristotle Aumentado ang personal nga pagsaulog sa adlaw sa gugma aron padayon nga ipadayag ang iyang gugma sa Bohol.

Tulo ka ruta ang byahe sa gobernador sa Pebrero 14, way kalainan sa naandan niyang pagduaw sa nagkalain-laing dapit sa lalawigan.

Una nga gibisita sa Gobernador ang barangay Maubo, Valencia kauban si Mayor Dionisio Neil Balite ug Bokal Nathaniel Binlod ug SB Member Rammel Cagulada. Gihatod ni Aumentado ang ayuda sa kagamhanang probinsyal alang sa kapunungan sa Maubo Small Farmers Association nga nagkantidad og Php399,402.

Ang maong ayuda alang sa ilang proyekto nga community-based feed formulation and marketing ubos sa pagpahigayon sa Provincial Cooperative Development Office.

Gipadayag ni Aumentado ang iyang kalipay nga bisan sa gilay-on sa Barangay Maubo gikan sa Kapitolyo ug sa kadaghan sa buluhaton sa iyang buhatan, nagahinan gihapon niya og higayon ang paghimamat sa katawhan.

Desidido si Aumentado sa padayon nga pagsuta sa matuod nga kahimtang sa katawhan direkta sa tagsa-tagsa ka komunidad aron tukma nga serbisyo ang maihatud usab niya mismo sa kabarangayan.

Sunod nga giduaw sa gobernador ang Barangay Banban, Dimiao kauban si Mayor Randolph Ang ug mga konsehal sa lungsod uban si bokal Nathaniel Binlod ug bokal Greg Jala, diin iyang gipanguluhan ang ceremonial turn-over sa duha ka lawak sa Banban Elementary School.

Ang pondo niini nga nagkantidad og Php3,590, 618.98 gikan sa Special Education Fund sa Kapitolyo.

Tubag ni Aumentado sa pagpasalamat ni principal Lucia Baliling nga dili lang ang mga imprastraktura ug mga kahimanan ang mahinungdanon, tungod kay ang iyang barometro sa kalampusan mao ang malampusong pagtapos sa mga tinun-an sa matag pinuy-anan nga mahimo usang instrumento sa paglambo sa maong pamilya.

Giduaw usab ni Aumentado ang Barangay Oac sa mao gihapong lungsod Dimiao pagduyog sa kasaulogan niini sa ika-244 nga anibersaryo sa pagkaumol sa maong barangay.

Personal niya nga nasaksihan ang kahimtang sa Barangay Oac, ug gipahibalo niya nga dunay ayuda ang iyang buhatan sa kantidad nga P200,000 alang sa ilang priority project.

Mibalik sa Kapitolyo ang gobernador aron sa pagtambong sa tigum uban si Regional Executive Director-7 Angel Enriquez sa Department of Agriculture.

Nakighinabi usab siya sa mga directors sa Philippine Drug Enforcement Agency nga sila si RD-7 Emerson Margate ug ARD-7 George Paul Alcovindas bahin sa pagsumpo sa impluwensya sa ilegal nga droga.

Mitambong usab si Aumentado sa blessing sa bag-ong kahimanan ug sakyanan sa Medical Outreach Unit (MOU) alang sa mga gitakda nga medical missions.

Ang MOU nagsaulog sa adlaw sa mga gugma, atol sa unang anibersaryo sa pagkahimutang sa botika sa kapitolyo sa kagamhanang probinsyal.

Samtang nagsaulog ang kalibutan sa adlaw sa mga naghigugmaay, gihiklin usa ni Aumentado ang personal niya nga pagsaulog uban sa iyang kapikas, Kongresista Vanessa Cadorna-Aumentado, tungod kay nasayod ang magtiayon nga ang ilang gugma sa Bohol di makapaabot. ALT/PIMO