DIREKSYON SA ADMINISTRASYONG ABANTE NGADTO SA REPORMA; 6 KA REBELDE MISURENDER KANG GOV. ARIS

Unom ka mga kanhi sakop sa New People’s Army (NPA) ang mibalik sa sabakan sa balaod atol sa ika-14 nga kasaulogan sa Provincial Peace Day.

Upat ka lalaki ug duha ka babaye ang labing ulahing mitahan nga gikan sa mga lungsod sa Balilihan ug Ubay.

Kini sila mao sila si Dominador Huiso Nambatac aka Reynante/Oloy, Aygene Huiso Nambatac aka Randy, Maritess Tumampos Nambatac aka Tessa, ug Narciso Odarve Nambatac aka Abu pulos taga San Pascual, Ubay uban kang Jonathan Llorente ug Marlyn Llorente mga taga Hanopol Norte, Balilihan.

Dul-an 400 ka tawo ang mitambong sa kasaulugan sa ika-14 ka tuig sa maong anibersaryo nga gisalmutan sa mga Kauban sa Reporma (KR) didto sa Bohol Cultural Center.

Gikataho ni Gobernador Erico Aristotle Aumentado sa nakalabay nga mga pakigpulong niini nga usa sa tumong sa iyang pagduaw sa kabarangayan mao ang pagsubay sa kahimtang sa katawhan aron masayran ang husto nga tabang ug serbisyo nga ipadangat bisan sa mga layo ug hilit nga komunidad.

Paghinubay ni Aumentado, dili lang ang duaw ug kukabildo ang nahimugso alang sa maong direksyon apil usab niini ang Abante Barangay Service Caravan nga nagtutok sa pagpadangat og serbisyo sa mga hilit nga dapit aron pagkumbinsir sa mga nahibiling rebelde pagbalik sa sabakan sa gobyerno.

Subay niini, mitambong si Aumentado sa nahisgutan nga kalihukan.

Usa kini ka kasaulogan paghandum sa adlaw nga gideklarar ang lalawigan isip insurgency-free province kaniadtong Pebrero 2010 sa panahon sa amahan nga Aumentado, kanhi Gobernador Erico Aumentado.

Pinaagi sa pagdumala ni manlalaban Aquilino Felicitas Jr., gipahigayon ang piniliay sa bag-ong mga opisyales sa ilang kapunongan nga PEACE Inc. ( People's Advocacy on Collaboration and Empowerment). Ang kanhi presidente Paulo Carnice mitunol sa katungdanan sa bag-ong presidente nga si Danilo Olaivar.

Gipahigayon ni Aumentado ang pagpapanumpa sa mga bag-ong opisyales sa PEACE Inc.

Gipanguluhan usab niini ang ceremonial turn-over sa financial assistance nga nagkantidad og P860,000. Gidawat kini sa representante sa upat ka mga cluster nga mao ang Inabanga, Bilar, Candijay ug Sevilla. Kini aron makabaton sila og livelihood sa ilang pagsugod sa bag-ong kinabuhi.

Gipadayag sa gobernador ang iyang kalipay sa nagsaka nga numero sa mga sakop sa walhong grupo nga misurender sa pangagamhanan ubos sa iyang administrasyon.

Kahinumduman nga human sa pagsurender ni Elizar Nabas, laing 60 ka mga kanhi membro sa CPP/ NPA ang misurender usab ngadto kaniya.

Duha sa unom nga returnee adunay gihuptan nga armas nga ilang gitahan ngadto kang Aumentado uban kang PLT Dunhill Sarmiento, ug PCol. Lorenzo Batuan ug ubang mga opisyales.

Sa tema nga "Kauban sa Reporma; Kauban sa Pag- abante", gipadayag ni Aumentado ang hagit nga tapuson na ang pagsumpaki sa idelohiya ug insurhensiya, hinuon ipagtigbabaw ang kalinaw sa komunidad.

Gidayeg ni Aumentado ang OPSWD uban sa PTF- ELCAC sa pagpahiluna sa kalihukan ug gipasalamatan ang mga ahensya sa pagtambayayong sa maong kalihukan.

Milangkob ang mga partisipante sa 15 ka cluster nga mao ang Alicia 1&2, Catigbian, Carmen, Candijay, Ubay 1,2&3, Inabanga, Sevilla, Batuan, Bilar, Danao, Antequera ug sa gihiusa nga Talibon-Trinidad-Bien Unido ug San Miguel. ALT/PIMO