DIVERS COOP, KASUNDALOHAN NAGHIUSA SA PAGPANALIPUD SA DAGAT

Malampuson nga gipahigayon sa hiniusang pwersa sa Bohol Divers Advocacy Cooperative (BDAC) ug sa 21st Special Forces Company Riverine" sa seremonyas sa paglagda sa usa ka memorandum of agreement (MOA), nga gipahigayon didto sa Manga Wharf, dakbayan sa Tagbilaran niadtong Pebrero 22.

Ang BDAC usa ka organisadong kooperatiba nga rehistrado sa Cooperative Development Authority (CDA) samtang ang 21st Special Forces Company nga Riverine kabahin sa Philippine Army's Special Forces Regiment ubos sa Philippine Army ug Armed Forces of the Philippines.

Sa hamubo nga programa, gipasabot ni F/Supt. Raul Bustaliño nga ang tumong sa pagtambayayong mao ang maumol ang usa ka kasabutan tali sa duha ka pundok.

Kini gisaksihan mismo ni F/Senior Supt. Pedro Balatero, assistant regional director for operations.

Sumala sa kasabutan, giila sa duha ka partido nga bililhon ang pagtambayayong aron mapanalipdan ang ecosystem sa Bohol ilabina ang mga dive sites ug ang marine resources nga sakip sa Bohol.

Pinaagi sa MOA, gipadayag ang tulo ka mahinungdanong ideolohiya nga ilang gitamdan nga mao ang mutual cooperation, sharing of assets ug shared responsibility.

Ang BDAC girepresentahan ni manlalaban Florendo Columnas, chairman sa maong kooperatiba, samtang ang Special Forces Battalion girepresentahan ni Capt. Bilver Butale, commanding officer,.

Gidayeg ni Gobernador Erico Aristotle Aumentado ang mga inisyatibo sa mga hingtungdan ilabina ang ilang pakigsaad sa usa ka aktibo nga partisipasyon bahin sa mga pagsubay, pagpatrolya ug pag-imposar sa mga balaodnon nga magpugong sa mga iligal nga kalihukan sa kadagatan sama sa "overfishing", "pollution" ug paguba sa mga marine habitats.

Si Undersecretary Serafin Baretto Jr. sa Department of Interior and Local Government maoy pinasidunggang dinapit sa maong kalihukan. Iyang gidasig ang milagda ug misaksi sa MOA signing sa iyang pakigpulong.

Si Bokal Tomas Abapo Jr. sa ikaduhang distrito ug pangulo sa komitiba sa peace and order, mipakita sa suporta sa maong MOA pinaagi sa iyang pagtambong.

Si Aumentado aktibo sa iyang suporta sa mga kalihukan sa pagpanalipod sa kinaiyahan sama sa Danajon Double Barrier Reef, ug pagsuporta sa mga grupo nga dunay pagpakabana niini dili lang ang BDAC apan lakip ang Panglao Association of Dive Operators ug uban pa nga grupo sa divers.ALT/PIMO