"Duol na ang katumanan sa pangandoy sa mga lumulupyo sa Barangay Montesuerte, sa Lungsod sa Carmen kay ang SIBAT Inc.( Sibol ng Agham at Teknolohiya) ug MISEREOR, nakig-partner kanato uban kang Mayor (Conchita) Toribio Delos Reyes, aron makabaton sa maayo nga tinubdan sa tubig, ug kuryente ang atong katawhan sa Carmen," pamahayag ni Gobernador Erico Aristotle Aumentado.
Kini maoy giluwatan sa gobernador sa social media human gipahigayon ang groundbreaking ceremony niini Pebrero 21 sa Sitio Mahayahay, Barangay Montesuerte, Carmen.
Dugang pa ni Aumentado, "ang atong mga komunidad, nagpaingon na ngadto sa kalig-on pagbaton sa kaugalingon nilang panginahanglan. Ang atong gihimo karon mao ang pagbenepisyo sa kinaiyahan aron ang katawhan makabaton sa limpyo nga tubig ug sugang dagitabnon diin kini dili na lisod kab-uton kay mahimo na nga mapahimuslan sa matag panimalay.”
"We are embarking on a journey towards self-reliance for our communities. What we are doing today is harnessing the power of nature to secure a futurewhere access to clean water and household light is no longer a luxury but a constant presence,” nagkananyon ang gobernador.
Pinaagi sa SIBAT Inc. ug MISEREOR, tukuron ang usa ka water system nga palihukon pinaagi sa usa ka renewal energy technology nga wind turbines.
Gamiton kini aron matubag ang panginahanglan sa komunidad bahin sa tubig mainom ug ibisbis sa mga kahumayan pinaagi sa irigasyon.
Ang solar-wind energy, mahimong makakuha og kuryente ngadto sa 5kW nga magamit paghinlo sa 125 litro nga tubig matag indibidwal kada adlaw, makapatubig kini sa irigasyon ug makahatag og kuryente taman sa tulo ka bombilya sa matag panimalay.
Ang maong mga inisyatibo gipahaom sa panginahanglan sa tibuok sitio, ang benepisyaryo ning maong proyekto. Giumol ang usa ka kapunongan nga aktibo sulod sa dugay na nga mga katuigan diin ang mga membro mga lumulupyo sa Sitio Mahayahay.
Sa ilang pagparehistro sa Department of Labor and Employment( DOLE), ang kapunungan gihinganlan sa DOLE og "Sitio Taytay Farmers Association”.
Pinangulohan ni Ireneo Pinarejo, sa pagkakaron, duna kini 28 ka aktibo nga mga sakop.
Si Aumentado malaumon nga uban sa pagiya ni Kapitan Michael Balentucas sa Montesuerte, ug ni Pinarejo, magmabungahon ang maong proyekto ug daghan ang matabangan.
Matud ni Aumentado, sa ilang pagkahinabi didto sa kauluhan tali sa mga representante sa SIBAT, nagduhaduha siya kung masugdan ba ang proyekto apan iyang personal nga nakita ang dapit nga pagabutangan sa renewal energy tungod sa kalisod sa agianan.
Mihatag si Aumentdo sa iyang suporta sa proyekto sugdan sa pagpaayo sa agianan alang sa sayon nga transportasyon sa mga materyales nga gamiton. Ipagamit usab niini ang mga heavy equipment sa buhatan kung kinahanglanon.
Gipasalamatan usab ni Aumentado ang tanang nahimong kabahin sa kalampusan sa Sitio Taytay Farmers Association.
Gawas nila ni Aumentado, Toribio Delos Reyes, Belentucas, Bokal Nathaniel Binlod, Belentucas ug Pinarejo, mitambong usab sa seremonyas sila si Estrella Catarata, SIBAT executive director; ug Jay Mart Erasquin, project coordinator. ALT/PIMO
No comments:
Post a Comment