Mokabat sa 433 ka pamilya ang nahimong benepisyaryo sa ayuda gikan sa Kapitolyo sa Barangay Catmonan, lungsod sa Calape Marso 11.
Gipahigayon sa kagamhanang probinsyal ang medical and dental outreach program ubos sa direktiba ni Gobernador Erico Aristotle Aumentado.
Gipadayag sa gobernador ang iyang kalipay sa malampuson nga pagdumala niini sa Medical Outreach Unit (MOU) uban ang Provincial Health Office (PHO).
Nagpasalamat usab ang gobernador sa suporta gikan sa lungsod sa Calape ug sa mga nagboluntaryo nga mga doktor para sa maong medical mission.
Kapin sa 200 ka mga residente ang nakapahimulos sa libreng pagpahiling sa panlawas nga gitanyag sa mga doktor gikan sa MOU. Tanan kanila gihatagan usab sa libreng tambal, ug bitamina.
Ang tulo dentista sa PHO malampuson nga nagserbisyo sa 58 ka mga pasyente nga nagpaibot sa ilang daut nga ngipon ug nahatagan sa tambal.
Misuporta usab ang Office of the Provincial Social Welfare and Development (OPSWD) sa maong kalihukan pinaagi sa pagpang-apod-apod og foodpacks nga may sulod nga bugas og mga delata ngadto ngadto sa 433 ka mga pamilya.
Sa laing bahin, personal nga gitunol ni Aumentado ang ayudang pinansyal ngadto kang Kapitana Eleora Sy ug sa mga barangay opisyales nga nagkantidad og P50,000.
Giawhag ni Aumentado ang mga opisyales nga paspasan ang pag-liquidate sa maong ayuda nga gipaagi sa buhatan ni Bokal Aldner Damalerio aron ilang madawat ang P200,000 gikan sa iyang buhatan para sa ilang mahinungdanon nga proyekto.
Gidasig ni Aumentado ang mga lumulupyo sa Barangay Catmonan nga magkahiusa sa pagpalambo sa ilang barangay.
Mitambong sa nahisgutang kalihukan si Calape Mayor Julius Caesar Hererra uban sa pipila ka membro sa Sangguniang Bayan.ALT/PIMO
No comments:
Post a Comment