TABANG PARA SA MGA KAUBAN SA REPORMA, GIAPOD-APOD NI GOV. ARIS

Gitunol ni Gobernador Erico Aristotle Aumentado ang gisaad nga P10,000, ayudang pinansyal ngadto sa mga “Kauban sa Reporma” didto sa Ceremonial Hall, Provincial Capitol, Marso 26.

Kini lima ka buwan human ang hiniusang paghural ngadto kang Aumentado sa 61 ka mga kanhi rebelde nga sakop sa Communist Party of the Philippines-New Peoples Army (CPP-NPA).

Kahinumduman nga Oktubre 7, 2023 didto sa Ceremonial Hall, misaad ang 61 ka mga surenderees atol sa mass oath-taking ceremony nga ila nang isalikway ang kanhi nila nga ideolohiya ug armadong pakigbisog batok sa gobyerno.

Gidawat sa gobernador ang ilang panumpa, ug misaad usab kini sa pagsuporta kanila, pinaagi sa mga programa sa gobyerno ug sa paghatag sa ayudang pinansyal nga tag Php10,000 matag usa isip puhunan sa ilang panginabuhian.

Kini ang hinungdan nga ning adlawa, Marso 26, nagkatapok ang mga KRs aron sa pagdawat sa hinabang gikan sa Kagamhanang Probinsyal.

Mikabat ang kinatibuk-ang pondo og P610,000 nga giapod-apod sa gobernador pinaagi sa Office of the Provincial Social Welfare and Development (OPSWD) gidumala sa hepe niini nga si Mita Tecson.

Usa kanila, ang atoa sa laing dapit busa 60 ra ka mga KR ang midawat sa tag P10,000 nga gilangkob sa 39 gikan sa lungsod sa Trinidad ug Mabini, 18 sa Candijay, duha sa Carmen ug usa sa Catigbian.

Si PCol Lorenzo A. Batuan, Bohol PNP provincial director, mihangyo sa mga KR nga suportahan ang gobyerno, uban ang panghinaot nga ang nahitabo niadtong Pebrero 23 sa Bilar mao ang katapusan nga panag-enkwentro tali sa mga rebelde ug sa pangagamhanan.

Gidayeg ni 1LT Charmaine Sancho, civil military operations officer sa Philippine Army 47IB ang mga KR ug gitawag niya nga buhing pamatuod nga seryoso ang tumong sa pangagamhanan, paghatag og higayon sa mga rebelde nga mabuhi, kung sila mubalik sa sabakan sa gobyerno.

Subay sa taho ni Tecson ug PTF-ELCAC focal person Romeo Teruel, adunay 600 kapin ka mga KR ang anaa na sa pag-atiman sa pangagamhanan apan 300 kapin pa lang kanila ang dunay opisyal ug legal nga mga dokomento sa pagdawat kanila sa gobyerno.

Sa laing bahin, gipasabot sa gobernador nga ensakto ang desisyon sa mga KR pagbalik sa pangagamhanan kay ang mga rebelde dili gayod magmalampuson sa pag-alsa batok sa gobyerno o pagpulpog sa han-ay sa pangagamhanan.

Gidasig niini ang 60 ka mga KR nga impluwensyahan ang ilang mga kauban nga anaa pa sa bukid, pag-surender kay matud pa, ang matuod nga kalinaw anaa sa pangagamhanan.PIMO/ALT