GOBERNADOR ARIS AUMENTADO PORMAL NGA GIDAWAT SI MARJIL BUNO SA PAGTAHAN NIINI NGADTO SA PANGAGAMHANAN

"Nadala sa pasalig, tagaan og yuta, atimanon akong ginikanan, tagaan sa tambal ug pagkaon," kini maoy giluwatan ni Marjil Buno, 36 ang panuigon , ulitawo ug gikan sa San Roque, Talibon, sa dihang iyang gitubag ang pangutana ni Gobernador Erico Aristotle Aumentado nganha kaniya didto sa buhatan sa gobernador sa Kapitolyo Mayo 7, kung unsa ang nakakumbinsi kaniya pagsulod sa armadong pagpakigbisog.

Ang saad nga maayong kinabuhi, mao ang nakaaghat kaniya pagpakig-abin sa rebeldeng grupo.

Upat ka tuig gikan sa iyang pagsulod sa armadong pagpakigbisog tuig 2020, miatubang si Buno ngadto kang Gobernador Aumentado isip surrenderee, human iyang natimbangtimbang nga ang matuod nga kasiguruhan sa kinabuhi anaa sa gawasnong katilingban.

Dugang niini, matud ni Buno, "pero bisag kausa walay nadawat akong papa, nagkinahanglan unta siya ug tabang kay siya ra usa sa Bohol. Akong gihangyo na pod, mihatag og usa ka libo buwan, pero sa ikaupat ka buwan wala na kay wala na daw budget."

Nasayran nga si Buno mitahan sa iyang kaugalingon ngadto sa Bohol Provincial Police Office (BPPO), pinanguluhan ni Provincial Director Lorenzo A. Batuan Abril 12.

Kinuyugan ni PTF-ELCAC Focal Person Romeo Teruel, PD PCOL Lorenzo A. Batuan, PLTCol John Escober, PLTCol Joemars Pomarejos, PLT Dunhill Sarmiento, PLT Noreijun Rosales, 1LT Charmaine Sancho, 1LT Ronel Sarip, SGT Erwin Ore ug Ian Jay D. Tejada, dala ni Buno ang iyang gihuptan nga armas AK-47 ug gitugyan niya kini ngadto kang Gobernador Aumentado.

Gitumbasan usab kini sa Gobernador sa kantidad nga Php25,000 isip pahalipay sa iyang pagtahan sa maong armas.

Sumala sa testimonyo ni Buno atubangan sa Gobernador, nga nadawat sa armadong grupo ang mensahe nga gipaabot ni Aumentado ngadto kanila sa pagsurender ngadto sa Pangagamhanan aron sa pagluwas sa ilang kinabuhi kay dili gayod sila mudaog batok sa gobyerno, ug ang administrasyon ni Aumentado andam sa pagtabang sa tanan nga musalig sa pangagamhanan. Apan nagdumili si Kumander Compoc sa maong desisyon sa pagsurender.

Saksi si Buno sa engkwentro sa Campagao, Bilar gumikan usa siya sa temporaryo nga mipuyo sa sa panimalay sa usa ka ginganlan og Julius nga ilang giabtan, apan swerte nga nakaikyas si Buno gikan sa maong hitabo nga miresulta sa pagkakalas sa kinabuhi sa ilang giila nga lider, kumander Compoc alyas Silong.

Si Gobernador Aumentado, mipadangat sa iyang pahalipay ngadto kang Buno sa iyang desisyon nga pagbalik sa landong sa pangagamhanan.

Misaad kini sa pagtabang kang Buno nga makabaton og kapaninguhaan sa panginabuhi aron makasugod pagpuyo sa disente nga kinabuhi.

Kahinumduman nga sukad sa pagsurender ni Elizar Samorano Nabas ngadto kang Gobernador Aris Aumentado, tuig 2022, dugang 61 ka mga sakop sa Communist Party of the Philippines -New People's Army (CPP-NPA) ang mihural atubangan kang Aumentado sa Ceremonial Hall, New Capitol, Oktubre 7, 2023, ug laing pito ang misurender usab sa buhatan sa Gobernador ning tuig 2024.ALT