Personal nga misubay ug miinom si Gobernador Erico Aristotle "Aris" Aumentado uban ni Congresswoman Vanvan Aumentado sa tubig nga produkto sa water desalination.
"Ania na, barangay Cataban, ang atong gipaabot nga tubig mainom, niabot na gyod," kini mao ang giluwatan ni Mayor Janet Garcia, hepe-ehekutibo sa lungsod sa Talibon ngadto sa mga islahanon, samtang mainiton niini nga gipasalamatan si Gobernador Erico Aristotle "Aris" Aumentado sa pagbutang og Potable Water System sa Isla Cataban, Talibon.
Matud ni Aumentado nga tubag sa ilang damgo ni Congresswoman Vanvan Aumentado ang tubig nga mainom nga andam nang magamit sa kaislahan sa Talibon ug Bien Unido.
Ang maong deklarasyon subay sa gipahigayon nga Blessing and Inauguration Ceremony, Mayo 11, sa maong proyekto nga nahimutang sa Isla Cataban, Talibon ug Isla Hingutanan West, Bien Unido diin nagkantidad ang matag usa og Php12,732,543.93.
Ang Gobernador nagkanayon nga 5,199 ka mga residente gikan sa barangay Cataban, barangay Nocnocan ug barangay Sag ang nakabenepisyo sa 22,000 ka litro nga tubig nga makuha matag adlaw gikan sa maong tinubdan.
Nasayran nga sa wala pa ang maong water desalination project, ang tubig mainom sa isla nagagikan sa mainland diin ang matag container niini, mikantidad og P60.00 ngadto sa P80.00.
Si Cataban, Kapitan Francisco Padin nagkanayon nga magkolekta ang barangay og P20.00 matag container sa tubig nga magamit kay kining maong koleksyon, pondo alang sa pagmintinar sa maong panubig. Aduna'y kapunungan sa ilang barangay nga gitahasan pagbantay niini aron pagsiguro nga mudonar ang maong proyekto.
Samtang sa laing bahin, ang Potable Water System sa Hingutanan West, Bien Unido mikabat sa 4,720 ka residente gikan sa barangay Hingutanan West ug Hingutanan East ang nakapahimulos niini.
Si Congresswoman Vanvan mipasabot nga bentaha ang pareho nga direksyon nila ni Gobernador Aris sa ilang pagpanerbisyo sa katawhan kay ang panglantaw sa representante sa segundo distrito dili taman lang sa iyang distrito.
Ang Kongresista mao ang mihulip pagpondo sa mga proyekto nga dili mapondohan sa Gobernador gumikan sa mga limitasyon sa Kagamhanang Probinsyal, aron mapadayon ang tinguha paghatag sa nag-unang panginahanglan sa mga Bol-anon sama sa limpyong tubig, kuryente, trabaho, edukasyon ug panlawas.
Si Vanvan Aumentado nagkanayon nga ang tubig sa Hingutanan East, Bien Unido, mapahimuslan sa 1,002 ka households o 4,720 ka residente sa Hingotanan West ug Barangay Hingotanan East sa lungsod sa Bien Unido kay mag-supply kini kanila og 22,000 liters nga tubig matag adlaw.
Pag-awhag ni Gobernador Aris, ngadto kang Hingutanan West Kapitan Leodelino Paden, ug Hingutanan East Kapitan Pantaleon Mabalatan Jr. nga ilang ampingan ang proyekto nga gikan sa buhis sa katawhan.
Si Kapitan Paden nagkanayon nga ang ilang barangay mukolekta og P10.00 matag container nga magamit isip pondo kay ang P5.00 niini alang sa pagmintinar sa panubig, P2.00 alang sa barangay nga kita ug P3.00 para sa mga trabahante niini.
Ang kalampusan sa maong mga potable water systems nahimong posible gumikan sa suporta sa World Bank, ug DA-PRDP sa proyekto sa Kagamhanang Probinsyal.
Matud ni Aumentado nga sinugdanan pa lang kini kay daghan pa nga potable water system ang nakalinya nga inaguruhan sama sa Isla Guindacpan, Talibon ug Isla Bilangbilangan Bien Unido. Iyang gikonsiderar usab ang pagbutang og water desalination sa Isla Balicasag, Isla Bilangbilangan ug Batasan sa Tubigon ug Anda.
Ang kongresista nagkanayon nga dili lang taman sa island barangays ang ilang commitment alang sa limpyong tubig, apil niini ang tanang kabarangayan sama sa anaa sa lungsod sa Ubay.
Apil nga mitambong sa duha ka managlahi nga inagurasyon ug mipadangat sa mainitong suporta si Bise Gobernador Dionisio Victor Balite, Bokal Jamie A. Villamor, Engr. Cirilo Namoc (Deputy Project Director DA-PRDP), Engr. Camilo Gasatan (Provincial Engineer), Engr. Ronilita Bunado, (Special Project Coordinator-PRDP), Talibon Mayor Janet Garcia, NXTLVL Water Technology Incorporated (Contractor)ug ang mga kapitanes sa hingtungdang mga barangay.ALT
This is a big help for the islanders who have access to clean and potable water. The initiative of Gov. Aris and Mayor Janet for community moya app sassa 350 health.
ReplyDelete