BOHOL BUSINESS PARK, GIPANGANDAMAN SA SAGILITY

Gipahigayon sa mga kadagkoan sa Kapitolyo, pinanguluhan ni Gobernador Aris Aumentado ug Provincial Administrator Asteria Caberte, ang usa ka breakfast meeting didto sa buhatan sa Gobernador, Pebrero 6, ug gitambungan kini sa mga sakop sa Sangguniang Panlalawigan uban sa mga hepe sa matag buhatan aron pangandaman ang pagsulod sa investor nga Sagility dinhe sa lalawigan sa Bohol.

Ang maong preparasyon timaan sa hiniusang pag-uyon sa pagsugod sa usa ka langyaw nga kumpanya sa business process outsourcing (BPO) diin gilauman nga makahatag ug liboan ka mga trabaho alang sa mga Bol-anon.

Matud sa tinubdan nga si Allan Sunglao, ang Sagility usa ka Amerikanong BPO nga kompanya nga nakabase sa India.

Desidido ang Sagility nga palapdan ang patigayon niini ug napilian sa maong health care company ang lalawigan sa Bohol nga dinhe ipahimutang ang business park niini ug ipahiluna sa usa ka lima ka ektarya nga lote.

Pagatukorun kini sa 21 ka ektarya nga old airport grounds sa dakbayan sa Tagbilaran diin 14 ka ektarya gipanag-iya sa Civil Aeronautics Authority of the Philippines apan ang Sagility adto ipahiluna sa pito ka ektarya nga gipanag-iya sa kagamhanang probinsyal.

Gihisgutan ang tanang gikinahananglan nga papel aron hapsay ang proseso sa pagpahigayon sa konstruksyon ug operasyon sa Sagility, ang gikinahanglan nga connectivity, ug ang mga entrance-exits sa maong dapit sanglit nahimutang man kini sa tunga nga bahin sa dakbayan.

Gikonsiderar usab ang pag- aghat sa pagpapauli sa mga kwalipikado nga OFW nga Bol-anon kung magkuwang ang mga empleyado nga ania sa Bohol aron pagtubag sa gikinahanglan sa Sagility nga 3,000 ka empleyado.

Gipreparar usab ang dokomento nga naghatag og gahom sa gobernador nga murepresentar sa lalawigan alang sa maong kalihukan.

Atol sa maong tigum, nakit-an nga higayon kini sa lalawigan nga himoong Information and Communication Technology destination, ilabina nga tumong sa probinsya nga mahimong usa ka malambuon nga BPO hub.

Si Caberte misugyot nga temporaryong gamiton sa Sagility ang Governor's Mansion isip buhatan alang sa "recruitment purposes" niini gumikan kay gikatakda nga muabotay na ang "recruitment team" sa kompanya.

Gipadayag ni Aumentado ang iyang mga pagpasalamat sa suporta sa iyang mga kauban sa buhat diha sa kapitolyo aron malampuson nga mapahigayon ang maong proyekto.

nisyal nga gikatakda ang buwan sa Marso nga mao ang pagsugod sa konstruksyon sa pagatukuron nga edepisyo sa Sagility.PIMO/ALT