MGA PROYEKTO SA KADAGATAN GITUKI SA BFAR-7 KANG AUMENTADO

Nagpahigayon og courtesy visit sa gobernador si Mario Ruinata, OIC regional director sa BFAR-7 didto sa Kapitolyo, Pebrero 5.

Nasayran atol sa maong pagduaw nga ang Bohol, lakip sa mga benepisyaryo sa Fisheries Coastal Resiliency (FishCoRe), usa ka proyekto sa nasudnong pangagamhanan pinaagi sa Fisheries Administrative Order (fao) 263 series of 2019.

Nakighinabi si RD Ruinata uban ni Candido Samijon PFO- Bohol ug Bruna Abrenica Senior Aquaculturist, bahin sa mga nakalinya nga mga proyekto sa BFAR ubos sa FishCoRe (Fisheries and Coastal Resiliency) diin apil ang Bohol sa mga benepisyaryo.

Si Samijon nagkanayon nga gipondohan kini sa World Bank ug gikatakda nga ipatuman sulod sa pito ka tuig. Kini ubos sa gitawag og Ecosystem Approach to Fisheries Management (EAFM) subay sa RA 10654.

Dugang ni Abrenica, nga gipangusgan ang bahin sa "conservation management, production and infrastructure” isip giya sa pagpatuman niini.

Kauban usab sa maong tigum si provincial administrator Asteria Caberte, Liza Quirog sa Office of the Provincial Agriculturist (OPA); Al Piloton, kanhi regional director sa BFAR; executive assistant Nunila Pinat ug mga kawani sa OPA.

Nasayran nga sa tibuok nasud, duha ra ka gitawag ug Fisheries Management Areas (FMAs) ang gipondohan sa World Bank ubos sa FishCoRe nga mao ang FMA 6 ug FMA 9.

Onse ka probinsya ang makabenepisyo sa maong proyekto gumikan kay nahisulod sa FMA 9, ug lakip niini ang Bohol.

Ang Bohol kabahin sa FMA 9 duin kauban niini ang 7, 10 ug 13 samtang ang FMA 10 naglangkob sa Cebu Strait, Danajon Bank, ug Maribojoc Bay.

Lakip sa FMA 9 ang Bohol sea, nag-atubang sa Mindanao sea, ang Guindulman Bay, ug Candijay Bay.

Dinhi sa lalawigan, 17 ka mga lungsod ang makapahimulos niini lakip na ang Panglao, Dauis, Albur ug Baclayon sa unang distrito; Trinidad, Carlols P. Garcia ug Ubay sa ikaduhang distrito; ug Loay, Lila, Dimiao, Valencia, Garcia Hernandez, Guindulman, Duero, Anda, Mabini ug Candijay sa ikatulong distrito.

Gituki usab ni Aumentado kang Ruinata ang iyang gisugyot nga mga proyekto lakip ang fish complex, fish cold storage facility, sea weeds integrated laboratory sa Ubay uban ang kolaborasyon sa mga tunghaan nga pang-agrikultura; ug ang mangrove crab hatchery and nursery sa Mabini.

Kahinumduman nga gibanhaw ni Aumentado ang Joint Memorandum Circular No 3, series 2020 bahin sa Municipal Price Coordinating Council (MPCC) pinaagi sa pagpagawas sa memorandum circular no.1 pagsuporta sa gipakanaog nga bantay-presyo alang sa mga nag-unang palaliton partikular sa isda.

Matud ni Aumentado, tubag kini alang sa mga pipila nga diskontento nga nagkondena sa administrasyon bahin sa taas nga presyo sa isda.

Dugang ni Aumentado nga dugay na kini nga problema ug ang iyang mahimo mao lang ang pagpangita og solusyon alang niini.

Malaumon ang gobernador nga pinaagi sa bilyones nga kantidad nga proyekto sa FishCoRe, makadugang kini sa produksyon sa isda sa Bohol aron mubarato ang presyo niini.

"Dako kini nga tabang kanato sa atong mga lakang pagpaubos sa presyo sa isda ug uban pa nga pagkaon nga gikan sa kadagatan," matud ni Aumentado.

Si Ruinata, mubalik sa kapitolyo alang na sa implementasyon sa maong proyekto.PIMO/ALT