GATUSAN KA BOL-ANON NASERBISYUHAN SA MEDICAL MISSION SA JAGNA

Gatusan ka mga Bol-anon nga nagtinguha nga makabaton og alibyo sa ilang problemang panlawas nahatagan og pagtagad atol sa gihimong medical surgical mission didto sa lungsod sa Jagna.

Ang tulo ka adlaw nga mission gipasiugdahan sa kagamhanang probinsyal pinaagi sa Governor's Office-Medical Outreach Unit (GO-MOU) ug SUI GENERIS Mission.

Ang major medical surgery niini didto gipahigayon sa Teodoro B. Galagar District Hospital (TBGDH) ubos sa pagdumala ni Dr. Romualdo Ruiz, hepe sa nahisgutang tambalanan.

Libre ang tanang taga Bohol gikan sa tulo ka distrito nga nakapahimulos sa maong serbisyong panlawas.

Gipahigayon ang pagpanglista ug screening sa Pebrero 7, samtang Pebrero 8 gisugdan ang operasyon sa sunod adlaw. Sa Pebrero 9 gitakda ang outreach alang sa 200 ka mga bata ug samtang matapos ang pagpang-opera sa Pebrero 10.

Girehistro ang mga pasyente pipila ka adlaw sa wala pa ang aktwal nga kalihukan diin ang mga ngalan sa buot magpakonsultanga nagagikan sa mga rural health units.

Si Dr. Ryan Inting, usa sa mga membro sa team sa general surgery nagkanayon nga mukabat sa 100 ang tanan nga membro sa SUI GENERES Mission nga mianhi sa Bohol ug mitanyag sa ilang libre nga serbisyong medikal.

Ang SUI GENERIS gipanguluhan ni Dr. Adrian Gomez ug Dr. Yul Bontia ug mokabat sa 20 ka mga surgeons uban sa mga dentista, opthalmologists, anesthesiologists, mga general practitioners ang gikan sa Cebu Doctors University Hospital nga ania sa Bohol.

Apil niini ang mga nurse ug mga medical representatives ang miabot sa lalawigan.

Si Dr. Patrick John Eleazar mipasabot nga ang vascular surgery, dental, opthal, cataract ug uban pa nga minor operations gipahigayon sa Jagna Cultural Center, samtang ang mga major operations didto gipahimutang sa nahisgutang tambalanan.

Miboluntaryo usab pagtabang ug paghatag sa ubang medical supplies ngadto sa kalihukan ang Mabuhay DESERET Foundation nga gipanguluhan ni Grant Wearne gikan sa Estados Unidos uban ni Janis Redulla ug Yushimie Alcantara.

Personal nga mibisita si Gobernador Erico Aristotle Aumentado sa medical mission aron sa pagsiguro nga hapsay ang dagan sa maong kalihukan. Mipadangat ang gobernador sa iyang mga pagpasalamat sa SUI GENERIS sa aktibo niini nga pagpakigtambayayong alang sa kalampusan sa medical surgery mission.

Si Bise Gobernador Dionisio Victor Balite nagkanayon nga ilang paninguhaon nga kini masubli pagpahigayon sa sunod nga tuig.

Matud pa nga ang maong serbisyong panlawas naglakip sa external hemorhoids, cholelithiosis, goiter, cyst, hernia, cataract, ptyridium, nagkinahanglan sa tooth extraction ug mga major operations.Ang pagbaton sa maayong panlawas sa mga Bol-anon mahinungdanon nga direksyon ug agenda ni Gobernador Aumentado.PIMO/ALT