ONLINE SYSTEM SA KAPITOLYO GIDAYEG SA BLGF

Gidayeg sa mga kadagkoan sa rehiyonal nga buhatan sa Bueau of Local Government Finance ( BLGF), ang online system nga gipahigayon sa lalawigan sa Bohol.

Kabahin kini sa nahisgutan, atol sa pagbisita ni Regional Director Gerardo Avorque sa Bureau of Local Government Finance (BLGF) sa Rehiyon 7 ngadto sa buhatan ni Gobernador Erico Aristotle Aumentado.

Ang maong pagduaw gisaksihan ni manlalaban Handel Lagunay, hepe sa Provincial Legal Office, Eustaquio Socorin sa Provincial Treasurer’s Office (PTO), Rene Hayag, Provincial Assessor, manlalaban Kevin Soon sa Local Treasury Operations Office ug uban pang mga kawani sa BLGF-7.

Sumala pa sa mga bisita, ang maong online system diin computerized na ang pagbayad sa panudlanan angay nga isugyot sa tanang mga kagamhanang lokal.

Lakip niini ang pagbayad ngadto sa PTO sa mga buhis, nadawat nga serbisyo, ingon man ang sweldo ug benepisyo sa mga kawani.

Si Socorin mipasabot nga ang Land Bank mao na unya ang opisyal nga banko nga hulugan sa sweldo sa tanang empleyado sa kagamhanang probinsyal.

Sa laing bahin, si Avorque mipahibalo nga subayon sa ilang buhatan ang tanang mga dakbayan ug lungsod kung gitutukan ba ang koleksyon kabahin sa real property tax (RPT) ug sa Contractors' Tax.

Sa contractors' tax partikular nga gitumbok mao ang kolektahon nga buhis sa kagamhanang probinsyal gikan sa mga nagbaligya og yuta ilabina kadtong mga yuta nga gibayran sa Department of Public Works and Highways (DPWH) gumikan kay naapil sa road widening o road right of way.

Atol sa maong tigum, si Soon nangutana kang Socorin kung nadawat na ba niini ang mga rekisito kabahin sa loan certification sa waterworks kabahin sa loan sa kapitolyo sa nakalabay'ng mga tuig.

Si Socorin mitubag nga ang proseso niini kasamtangan nga na-pending samtang gitun-an kung unsaon paghapsay nga makabaton kini og mabungahon nga revenue-sharing tali sa kagamhanang probinsyal ug sa mga hingtungdan nga lungsod.

Nagkanayon si Aumentado nga angayan plantsahon ang positibo nga "economic impact" ngadto sa katawhan kabahin sa proyekto nga waterworks nga giimplementar sa kanhi administrasyon sa di pa ipahigayon ang hingpit nga implementasyon niini, gumikan kay ang tinubdan sa pondo gikan man sa pagpanghuwam og kwarta (loan) sa dako nga kantidad.

Tinguha sa gobernador nga manapit og dugang mga investors nga mububo sa ilang puhunan sa lalawigan kabahin sa mga nag-una nga serbisyo sama sa tubig, ug kuryente, aron ang lalawigan makabaton og dugang income nga di na kinahanglan mangutang og dako nga kantidad. Pinaagi niini, makahatag usab og trabaho sa katawhan.

Sa natad sa pagmina, bisan tuod kung ang permiso niini gikan sa nasudnong pangagamhanan partikular sa Department of Environment and Natural Resources (DENR), ang hingtungdang lokal nga kagamhanan makakolekta sa mas taas nga koleksyon sa buhis pinaagi sa contractors' tax basi sa mga "heavy equipment" nga gipanggamit sa operasyon ug sa "actual use" sa maong gimina nga yuta.

Gipadangat usab ni Aumentado ngadto kang Avorque ang mga reklamo sa mga "buyer and seller" og mga lote sa Panglao ug Dauis gumikan, matud pa, mas dako ang bayranan ngadto sa BIR kaysa sa aktwal nga balor sa yuta.

Ang mga kawani sa BLGF mipasabot nga sa gipahigayon nga public hearing niini sa BIR, walay mipakita og pamahayag sa pagbabag o pagreklamo bahin sa giduso sa BIR nga bag-ong schedule of market values sa mga kayutaan ug uban pa nga pagakuhaan og buhis.

Dugang pagpahibaw gikan sa rehiyon nga ang Bohol mao ang usa sa mga probinsya nga ginadayeg sa BLGF gumikan sa maayo nga proseso pagpahigayon sa pinansyal nga bahin.PIMO/ ALT