Sa ikaduhang adlaw nga pagsaulog sa Ubi Festival ning tuig 2023, gipahigayon ang Ubi Cook Off didto sa Bohol Showcase Center, pinaagi sa pagdumala sa Bohol Provincial Tourism Office (BPTO), Disyembre 5.
Ang Ubi Cook Off matud pa, "highlight" sa tibuok kasaulogan, kay usa kini ka kompetisyon nga nagpadayag sa nagkalain- laing paagi pagmugna og pagkaon gikan sa ubi, nga gipatubo sa kaugalingong isla sa Bohol.
Si Gina Capirig nga representante ni Joan Pinat sa BPTO, nagkanayon nga ang pagkapili sa isla sa Bohol isip UNESCO Global Geopark, may kalabotan sa mga pinasahe nga mga hiyas nga anaa sa Bohol sama sa gipalig-on nga mga protected area, talagsaon nga mga talan-awon, mga Geofood ug uban pa.
Pagdugang ni Capirig, ang Geofood, tradisyonal nga mga pagkaon nga gimugna pinaagi sa importante nga sangkap niini sama sa ubi, diin ang maong sangkap, gipatubo sa kaugalingong isla, ug nagasimbolo sa maong dapit.
Kahinumduman nga ang Ubi Kinampay gibantog nga nag-unang produkto sa Bohol ug kasamtangan nga ginaduso kini ngadto sa Intellectual Property Rights of the Philippines(IPOPHL), isip Geographical Indications sa Bohol Island.
Samtang sa laing bahin, adunay duha ka matang ang Ubi Bohol Cook Off; Professional Cook ug Home Made Cook.
Ang Home Made Cook adunay kategorya nga Soup, Appetizer ug Main Dish.
Onse ka mga koponan ang nisalmot sa Home Made Cook Off; ang Euthanasia gikan sa Tagbilaran City, Onlife Chef sa Guindulman, Team Maribojoc, D' ases sa Corella, Team Panglao, Eat Bulaga sa Balilihan, Lila Federation RIC, Team Lance sa Balilihan, Kusinerong Bisaya sa Corella, Buzz ' n Hub sa Tagbilaran City ug Kusinerong Sigbin sa Panglao.
Ang Bellevue Resort nisalmot sa Professional Cook kauban ang Hennan Resort, Mangaon Ta Restaurant, Kew Hotel, Ivy Wall, Astoria Bohol, ug uban pa.
Ang ganti sa mananaog nagkantidad og P25,000, samtang ang first runner-up makadawat sa ganti nga P12,000. Aduna usab pahalipay nga P5,000 uban ang sertipiko ngadto sa uban nga nisalmot.
Unom ka mga koponan ang nakuha nga finalists sa Home Made Cook ug sila musangka pag-angkon sa unang ganti.
Kini sila mao ang Team Euthanasia, Team Maribojoc, Team Panglao, Team Eat Bulaga sa Balilihan, Kusinerong Sigbin sa Panglao ug ang Buzz' N Food Hub sa Tagbilaran City.
Sa Professional Cook Dessert Category, tulo ang finalists nga mao ang Bellevue Resort, Hennan Resort ug Mangaon Ta Restaurant.
Ang mga hurado sa maong kompetisyon mao sila si Chef Robemin Veloso, Ma. Christina Sultan ug Marcellius Anthony Navalta.
Ang opisyal nga pag- anunsyo sa mga mananaog pagahimoon atol sa pagtak- op sa Ubi Festival Disyembre 6, didto sa Bohol Cultural Center, dakbayan sa Tagbilaran.
Si Gobernador Aris Aumentado nipadangat sa iyang pahalipay sa tanan nga nahimong kabahin pagpahigayon ning talagsaon nga kalihukan subay sa Provincial Ordinance 008-2023 ug Provincial Ordinance 014-2023 diin nagmando ang duha ka balaodnon sa pagsaulog sa Ubi Festival matag Disyembre 4 ug paggahin og pondo alang sa mas lalom nga pagtuon bahin sa Ubi.ALT/ PIMO
No comments:
Post a Comment