Mainiton nga giabiabi ni Bise Gobernador Dionisio Balite uban ni Chief of Staff Filipina Piollo, ug International Affairs Head John Maraguinot Jr. ang delegasyon sa Jiangxi, China sa ilang pagbisita sa Kapitolyo kagahapong adlawa Disyembre 5.
Si Balite ang kasamtangan nga mihulip kang Goberndor Aris Aumentado gumikan sa opisyal nga byahe sa Gobernador didto sa Dubai, pagtambong sa Local Climate Action Summit for the Conference of Parties( COP28).
Gipanguluhan ni Jiangxi Bise Gobernador Shi Ke ang delegasyon.
Ang probinsya sa Jiangxi ug ang probinsya sa Bohol adunay "sisterhood relationship" nga nagsugod 2006 sa termino ni kanhi Gov. Erico Boyles Aumentado.
Nipirma kini og cooperation agreement sa ngalan sa probinsya uban sa Gobernador usab kanhi sa Jiangxi nga si Gobernador Huang Zhiquan.
Malampuson ang maong sisterhood agreement ilabina sa natad sa agrikultura, turismo edukasyon, kultura, paugnat sa kusog, ug pagminina sugod niadtong tuiga hangtod karon.
Naestablisar usab ang sister mountain relationship tali sa Bohol Chocolate Hills ug Jiangxi Mt. Lushan sa Association for the World Famous Mountains.
Sa maong pagbisita, si Shi namahayag sa tinguha sa Jiangxi nga mas palawman ang panaghigalaay ug kooperasyon tali sa duha ka probinsya.
Sentro usab sa diskusyon ang bahin sa renewable energy ug ang posible nga pagbisita sa chinese investors nganhi sa Bohol aron pagpahigayon og pagtuon ug pamuhunan sa lalawigan, bahin sa solar energy aron matabangan ang Bohol, pagpakunhod sa presyo sa kuryente.
Apil usab nga gihisgutan ang imprastraktura ug ang posible nga market research ug investment bahin niini.
Kini mao ang mga importante nga bahin sa strategic agenda sa Kagamhanang Probinsyal ubos sa liderato ni Aumentado ug Balite.
Gipadangat usab nila ang pasalamat sa mainitong pag-abiabi sa Kagamhanang Probinsyal ug nang-imbita usab sila nga mutambong ang mga opisyales sa Bohol atol sa ilang tinuig nga tourism conference.
Gipahigayon ang paghinatagay og mga regalo tali sa duha ka probinsya.
Ang delegasyon sa Jiangxi nga kaubn ni Shi, mao sila si Sun Changxiang, Jiangxi Health Commission Deputy Director-General; Liang Xiaokang, Jiangxi Department of Commerce Deputy Director-General; Wan Yijun, Jiangxi Department of Culture and Tourism Inspector; Shu Weiguo, Secretariat Division of the General Office Analyst; Jin Ying, Jiangxi Foreign Affairs Office Secretariat Deputy Director and Principal Liaison; Du Yibo, Jiangxi Traditional Chinese Medicine Administration Bureau Deputy Division Director; Xu Chao, Jiangxi Office of Health Commission Deputy Division Director; and Zhang Qianfan, Jiangxi Department of Commerce.
Niderecho ang mga opisyales sa duha ka probinsya didto sa Bellevue Hotel, Panglao alang sa welcome dinner.
Naninguha ang Gobernador pagtambong sa maong welcome dinner apan wala maapas sa iyang skedyol. Hinuon gipadangat sa Gobernador ang iyang mainiton nga pagtimbaya kang Bise Gobernador Shi Ke ug sa tibuok delegasyon. ALT
No comments:
Post a Comment