FORUM BAHIN SA SAKTONG PAGDUMALA SA KWARTA SA GOBYERNO GIPAHIGAYON SA BOHOL

Nagpadayag si Gobernador Erico Aristotle Aumentado sa iyang dakong kalipay sa maayo nga resulta sa gipahigayon nga “forum on financial grant, implementation and liquidation” sa Panda Tea Gardens and Suites, dakbayan sa Tagbilaran.

Mudangat og pito ka adlaw ang maong forum gikan sa Disyembre 4 ngadto 6, 11 ngadto sa13 ug 18 nga pagasalmutan sa 2,218 ka mga barangay opisyales lakip na mga punong barangay ug mga tesorera sa 1,109 ka mga barangay sa Bohol.

Pagduaw ni Aumentado sa forum Disyembre 6, 143 ka mga barangay gikan sa segundo distrito ang mga nanambong gikan sa mga lungsod sa Bien Unido, Clarin, Buenavista, San Isidro, Danao, Dagohoy ug Talibon.

Si May D. Limbaga, hepe sa Provincial Internal Audit Office (PIAO) Department mao ang resource speaker kauban nila ni Joseth Celocia, hepe sa Provincial Accounting Office (PAccO); manlalaban Handel Lagunay, hepe Provincial Legal Office (PLO); Oscar Francisco Valles Jr., chief of staff for external affairs; ug mga executive assistants nga sila si Florencio Flores Jr. Stephen Rances ug Nelson Pon.

Gibansay ang maong mga opisyales sa angay nga buhaton para makabenepisyo sa mga financial assistance sa pangagamhanan, sama sa bereavement assistance, barangay aid ug uban pa.

Kinahanglan nga maka-liquidate sila og tarong sa ilang mga nadawat aron kwalipikado sila nga mudawat sa dugang mga kaayuhan, giklaro sa mga mamumulong.

Gihatagan usab sila og giya sa ensakto nga pagdumala sa mga financial assistance nga gikan sa pangagamhanan aron hapsay ang sistema sa barangay bahin sa pinansyal, maliquidate sa tukma nga panahon ug malikayan usab ang dispalko.

Giapod-apod usab sa bobernador ang tseke isip barangay aid sa kantidad P25,000 ngadto sa 143 ka mga barangay.

Gitakda nga hatagan sa maong tabang ang 1,109 ka mga barangay sa Bohol.

Gitakin ni Aumentado ang mga kawani sa Provincial Treasurer's Office (PTO) atol sa financial turn over aron pagsiguro nga walay trampas ang kalihukan.

Sa laing bahin, si Limbaga nagkanayon nga tumong sa forum ang mga bag-o nga opisyales sa barangay.

"Ang atong gipahibaw ani kanila mga programa sa province, unya pamaagi sa province, processing nato. Hinghatag pod ta og idea unsaon pag-plan, unsaon pag- implement. Atong gitabangan sila kay naay mga barangay nga daghan ang unliquidated, pasabot ana wala Mayas og implement ang project", pamahayag ni Limbaga.

Dugang pa niya, alang sa mga bag-o nga mga opisyales nga dunay problema sa mga unliquidated, muadto lang sa municipal accountant ug mangayo sa certification nga na- implement na ang project ug isukip ang mga hulagway sa nahuman na nga proyekto.

Kini ang buhaton aron nga ang barangay makadawat sa aid nga gipang-apod apod karon ni Aumentado, sumala pa ni Limbaga.

Nagkanayon si Aumentado nga dako ang iyang panglantaw nga magmalambuon ang kabarangayan ug kini ang hinungdan nga todo ang iyang suporta kanila.

Gipahinumdum niini nga sa kanunay ihatag sa publiko ang tinud-anay nga serbisyo ug limpyong gobyerno.ALT