Gipahigayon sa kagamhanan sa lalawigan ang usa ka medical mission ingon man ang pagpanghatag og bugas sa isla sa Mantatao lungsod sa Calape. Kini gitambongan mismo ni Gobernador Erico Aristotle Aumentado ug Mayor Julius Herrera niadtong Disyembre 6.
Personal nga gisubay ni Aumentado ang maong proyekto lakip na ang kahimtang sa komunidad kung musaka ang tubig sa mga panimalay sa lumolupyo.
Ang Medical Outreach Unit (MOU) ubos sa pagdumala sa Governor's Office, malampuson nga nagpahigayon sa medical mission ug nikabat sa 350 ang mga pasyente ang natabangan og nahatagan sa mga tambal ug bitamina.
Dugang pa niini, 271 ka mga pamilya ang nakadawat sa tabang pinansyal kantidad P3,000 matag pamilya pinaagi sa Assistance to Individuals in Crisis Situation (AICS) gikan sa buhatan ni Senador Imee Marcos.
Sa maong pagduaw, gitunol ni Aumentado uban ni Herrera ang tseke ngadto kang kapitan Jorge Aliño kantidad ₱25,000 alang sa mga proyekto sa barangay, pagpadayag sa ilang panaghiusa sa pagtabang sa Mantatao.
Matud sa gobernador, muhatag ang kagamhanang probinsyal sa kantidad nga P2.5 milyones ngadto sa barangay aron makabataon kini og covered court.
Si Herrera nagkanayon nga mohatag usab og P1M sa Mantatao isip tugbang sa gisaad ni Aumentado.
Gipadangat sa gobernador ang iyang pagpasalamat sa mga katimbang sa komunidad sama sa mga opisyales sa barangay, MOU, Office of Provincial Social Welfare and Development, Philippine Coast Guard (PCG), Armed Forces of the Philippines Army Special Forces nga nagbasi karon sa Bilar, Municipal Social Welfare Development Office ug lungsod sa Calape.
Positibo si Aumentado nga kung padayon ang pagtinabangay sa komunidad, mas daghan pa ang matabangan batok sa kalisod ug kapobrehon.PIMO/ ALT
No comments:
Post a Comment