OPERATION KLARO: BOHOL GIFT OF SIGHT SURGICAL MISSION GIPAHIGAYON SA UBAY

Usa ka surgical mission malampuson nga gipahigayon sa Don Emilio Del Valle Memorial Hospital (DEDVMH) sa lungsod sa Ubay niadtong Disyembre 4.

Gisuportahan ni Kongresista Vanessa Aumentado, ang maong mission nga gitawag og “OPERATION KLARO: Bohol Gift of Sight.”

Libre ang operasyon lakip ang mga tambal sa surgical mission.

Uban sa tabang sa kongresista, ang maong kalihukan gimugna pinaagi sa pagtambayayong sa kagamhanang probinsyal pinanguluhan ni Gobernador Erico Aristotle Aumentado, International Academy of Medical Specialists( IAMS), Gift of Life Foundation Inc., lungsod sa Ubay, diocese sa Talibon ug diocese sa Sto. Niño Ubay.

Sa unang pagbisita sa pundok sa IAMS sa milabay nga buwan, Si Gobernador Aris nagpadayag sa iyang kalipay sa aktibo nga pagtinabangay alang sa pagserbisyo sa katawhan.

Matud pa niya, pinaagi niini mahimong ipahiuli ang maayong panan-aw sa mga Bol-anong nagkalisod sa ilang problema sa mata apan walay igong salapi alang sa operasyon.

Mokabat sa 2,000 ka mga pasyente ang na-screen niadtong Disyembre 1-2. Gikan kini sila sa tulo ka mga distrito sa Bohol ug gikatakda maoperahan sa Disyembre 4-7 sa pterygium o katarata human sa pagpangayo og pagtugot (consent) sa pamilya.

Dunay subli nga check-up sa Disyembre 8-9 sa mga naoperahan sa mata aron pagtino anus-a taman ang paghatag og tambal hangtod maalim ang operasyon. Mudawat usab ang IAMS og mga 100 ngadto sa 200 ka pasyente ning mga adlawa alang sa mga dunay bukol nga buot maoperahan .

Sa petsa 9, pagahimuon ang thanksgiving mass alang sa maong misyon sa dili pa mobalik ang koponan ngadto sa kaulohan.

Mobalik ang mga sakop sa mission sa Disyembre 28-29 aron subayon kung maayo na ang pasyente nga ilang gioperahan. Kini mao ang mga pamahayag ni Francisco Zabayle, mission staff ug coordinator.

"Kung gumaling ang pasyente, di na s'ya kailangan bantayan sa kapamilya, kaya maari nang maghanapbuhay ang tagabantay. Gayundin naman ang gumaling na pasyente ay makapaghanapbuhay din. Gagaan ang buhay nila. kung umunlad ang kanilang kabuhayan ay uunlad din ang kanilang komunidad", matud pa ni Zabayle.

amtang sa laing bahin, nagkanayon sila si Alfredo Diez ug Lon Sinco sa Gift of Life, nga ang maong foundation nga kaabag sa IAMS nagsugod tuig 1996, atol sa termino ni Gobernador Erico Aumentado, amahan ni Gobernador Aris.

Kining maong surgical mission gipangulohan ni Dr. Federico Malubay uban nila ni Dr. Ronald Bell, president ug CEO sa Surgical Eye Expedition (SEE) International; Dr. Sean Collon, Himalayan Cataract Project; ug Dr. Madhavi Reddy, director sa SEE.

Timbang usab sa buluhaton sila si Dr. Mary Ann Ruiz, Presidente sa Gift of Life Inc.; Dr. Nelson Elle ug Dr. Esperanza Bayonas sa DEDMH; Dr. Arnold Cagulada, health consultant sa kagamhanang probinsyal; ug Dr. Vincent Entero.

Apil sa maong kalihukan si Dr. Frederick Francisco, Dr. Eulalio Eclipse, Dr. Albert Gironella, Dr. Norlito Sibug, Dr. Paulo Camacho, Dr. Reynaldo Capuz, ug 30 ka mga lisensyadong nurses sa Bohol.

Si Aumentado, kinsa atua sa Dubai pagtambong sa COP28 UAE, nipadangat sa iyang pagpasalamat sa Medical Outreach Unit (MOU) ug sa tanan nga nahimong kabahin pagtabang sa mga katawhan sa gihimong surgical mission.ALT/PIMO