"Seamanship comes natural with the Boholanos,” kini mao ang mensahe nga gipadangat ni Engr. William Christopher Liu Jr., CEO ug presidente sa Artemis Marine Industrial and Construction Inc.(AMICI), Marine Shipyard.
Giluwatan niya kini atol sa inagurasyon sa maong baradero Nobyembre 28 sa maong compound.
Ang shipyard o dockyard nahimutang sa barangay Cruz, Buenavista.
Mokabat sa 19 ka ektarya ang luna nga sakop niini alang sa maong pamatigayon.
Gipahigayon ang ribbon cutting nila ni AMICI CEO William Christopher Liu, Gobernador Aris Aumentado, Buenavista Mayor Dave Duallo, ug Engr. Alvin Basal, general manager.
Ilang gisuroy palibot ang shipyard ug nakit-an ang unom ka barko nga naka-drydock ug padayon ang pagtrabaho.
Apan matod pa, 4O na ka barko ang nag-drydock sa maong dockyard.
Matod ni Aumentado nga tuig 2015, niabot na kaniya ang impormasyon bahin sa pagtukod sa maong shipyard.
Bise mayor pa si Duallo niadtong panahona.
Nalipay ang gobernador nga nahinayon na ang inagurasyon diin si Duallo mao na ang lokal nga ehekutibo.
Nasayran nga Septyembre 2022 opisyal nga nahatagan sa Maritime Industry Authority (MARITIME) og lisensya nga Class- B Shipbuilding and Ship Repair ang AMICI.
Gipadangat ni Aumentado ang iyang mainitong pasalamat ug pahalipay sa magtiayon nga William Christopher ug Paulette sa ilang dedikasyon nga itanom ang maong investment.
Kini ilabina nga adunay skills training nga ila usab gipahigayon uban sa TESDA aron pagsiguro nga de kalidad ang serbisyo sa ilang mga trabahante.
Dugang sa gobernador nga dunay economic zone nga tukoron tali sa Buenavista, Getafe, Talibon ug Ubay.
Giawhag ni Aumentado si Liu nga mamuhunan sa economic zone.
Sa mensahe ni Duallo, iyang gipasalamatan ang tag-iya sa AMICI, kay matod pa gumikan sa maong investment, adunay 400 ka mga trabahante nga nakatrabaho.
Niini, 80 porsyento ang mga Bol- anon.
Ang kalihukan gitambungan sa mga membro sa lokal nga kagamhanan, mga opisyales sa barangay, PNP-Buenavista, CENRO, TESDA, Coastguard, MARINA, BFP, mga kawani sa Primary Group of Builders, mga mamumuhunan ug mga stakeholders.
Giawhag ni Aumentado ang pagtinabangay alang sa mas mauswagon nga paglambo sa ekonomiya sa lalawigan.ALT
No comments:
Post a Comment