Upat ka mga Balay sa Paglaum ang tukoron sa tulo ka managlahing lungsod pinaagi sa Bohol Provincial Police Office (BPPO) isip kabahin sa nagpadayon nga Libreng Alagad ug Balay (LAB).
Lakip niini ang duha ka pinuy-anan sa lungsod sa Inabanga ug tagsa sa mga lungsod sa Batuan ug Antequera.
Gitunol ni Gobernador Erico Aristotle Aumentado ang kantidad nga P320,000 ngadto kang PCol. Lorenzo Batuan, hepe sa BPPO, alang sa maong katuyoan atol sa gihimong command conference sa Multi-Purpose Hall sa Camp Francisco Dagohoy Enero 11.
Personal kini nga pondo ni Kongresista Vanessa Aumentado sa ikaduhang distrito ug sa gobernador alang sa nahisgutang housing program. Ang balay sa paglaum usa ka proyekto sa pagtambayayong tali sa BPPO pinaagi sa LAB.
Sumala pa ni Aumentado, nadasig siya sa pagpahigayon sa maong housing program aron makatabang kini sa gipasiugdahan usab sa BPPO.
Iyang gitahasan ang kapulisan nga maoy musubay kung kinsa ang angayan makabaton og panimalay pinasikad sa sukdanan nga ilang gihan-ay.
Subay sa taho ni Batuan ngadto sa hiniusang tigom sa Provincial Peace and Order Council (PPOC) ug Provincial Anti-Drug Abuse Council (PADAC), dunay 12 na ka panimalay ang napatukod ug naturn-over sa tuig 2023.
Duha ka balay ang nabuhat sa buwan sa Mayo didto sa Carmen ug Buenavista. Gisundan kini sa gitukod didto sa Talibon, duha sa Loon, Mabini, Trinidad, Dauis, Duero, Danao ug duha sa Catigbian.
Pinaagi sa pondo nga P320,000 ug sa pagtinabangay sa mga hingtungdang opisyales, upat ka mga balay ang gikatakda nga matukod sulod sa unang tulo ka bulan sa tuig 2024.
Si Aumentado nagkanayon nga dili man nila mahatag ang tanan, apan sa kanunay ilang gipaningkamotan nga ang labing nagkinahanglan og desente nga pinuy-anan mao ang benepisyaryo sa ilang programa.ALT/PIMO
No comments:
Post a Comment