Gipanguluhan ni Gobernador Aris Aumentado ang usa ka tigum didto sa kapitolyo, Enero 15, kabahin sa gilusad sa Department of Environment and Natural Resources (DENR) sa miaging tuig nga proyekto, diin ilang gitawag kini og project TRANSFORM (Transdisciplinary Approach for Resilient and Sustainable Communities). Nagsentro kini sa mga komunidad, pagpakunhod sa kapobrehon ug pag- atiman sa kalikopan, sibo sa tumong ni Aumentado.
Mitambong sa maong tigum ang mga opisyales sa Department of Environment and Natural Resources (DENR) pinangulohan ni Regional Executive Director Paquito Melicor Jr., RED 7; Regional Director Ma. Victoria Abrera sa Environmental Management Bureau, Assistant Regional Director (ARD) Charlie Fabre ug ARD Eddie Llamedo.
Lakip usab sa mitambong, sila si Provincial Environment Natural Resources Officer Ariel Rica, Raul Paler, OIC Community Environment Natural Resources Office; Marcial Ugay, DENR project coordinator ug ubang mga kawani.
Sa pikas bahin, uban kang Aumentado sila si Provincial Asteria Caberte, Ma. Fe Dominise, hepe sa Bohol Economic Development and Investment Promotion Office; Dr. Anthony Damalerio, hepe sa Provincial Disaster Risk Reduction and Management Office; Romeo Teruel, focal person sa Provincial Task Force-End Local Communist Armed Conflict; geologist Karl Michael Din, Joanne Pinat, OIC sa Bohol Provincial Tourism Office; ug Jovencia Ganub sa Bohol Provincial Environment Management Office (BPEMO).
Sa maong tigum, isip organizational meeting, pormal nga gipahigayon ang nahisgutang proyekto sa mga tinugyanan sa DENR.
Unang gituki ang GREEN ECONOMY MODEL (GEM) alang sa Panglao Island Rehabilitation and Restoration Project (PIRRP).
Matud ni Ugay, nga ang pagsugod alang sa transition sa mga programa ug proyekto niini ngadto sa GEM sa DENR pinasikad sa DENR Administrative Order ( DAO) 2017-08.
Gawas sa Panglao, ang ubang dapit diin ipatuman ang GEM mao ang Siargao, El Nido ug Coron sa Palawan ug Puerto Galera sa Mindoro.
Lakip sa maong kalab-uton ang pagpatuman sa mga balaodnon ug regulasyon kabahin sa mga istraktura nga natukod duol sa kabaybayonan kung nag-obserbar ba kini sa legal easement.
Sumala sa taho ni Ugay dunay walo ka mga bag-ong istraktura nga ubos sa ilang monitoring, duha niini sa Dauis ug unom sa Panglao.
Dugang ni Ugay sugod tuig 2018 hangtod 2023, sa 1,051 ka mga nasubay nga istraktura, 95 pa lang ang gipangguba na.
Gihisgutan usab ang mga lakang nga gihimo alang sa pollution control and prevention, ang pagpahigayon og ambient water quality test, diin nasayran nga dunay elemento sa fecal coliform sa mga katubigan sa nahisgutang mga dapit.
Lakip sa mga kalihukan nga pagatutukan sa buhatan tuig 2024 hangtod 2028, sumpay sa naunang mga nahisgutan mao ang relokasyon sa mga informal settlers, partikular ang mga Badjao nga nagpuyo sa kadagatan, ug ang rehabilitasyon sa seawall sa Alona Beach, Bolod ug Libaong sa Panglao.
Sa laing bahin, gipresentar ni Ganub, ang mga programa nga gitutukan sa kagamhanang probinsyal sama sa Biodiversity; pagpatuman pinaagi sa Coastal Law Enforcement Council (CLEC) sa mga balaodnong may kalabutan sa Danajon ug uban pa nga mga kalikopan, ug ang pagsubay sa mga flora ug fauna species sa tibuok probinsya.
ipalig-on usab ang imbintaryo sa greenhouse gases sa mga mangroves seagrass, watersheds, ug ang pagsubay sa mga gas emissions gikan sa mga kagamhanang lokal.
Gitakdang himoon ang financial literacy training alang sa mga MPA Management Councils sa mga lungsod sa Dauis, Talibon, Carlos P. Garcia ug Ubay.
Apil nga tutukan ang disaster management ilabina sa mga watersheds sa Loboc, Wahig Inabanga, Abatan, Soom, Moalong, Manaba, Panampan, Panangatan ug Lumbay.
Nagapadayon ang pagmugna sa BPEMO sa mangrove nursery sa mga kalungsuran.
Sa laing bahin, gipresentar ni Pinat ang plano alang sa rehabilitasyon sa sea wall sa Alona nga giaprobahan sa Tourism Infrastructure and Enterprise Zone Authority (TIEZA).
Positibo si Aumentado nga mas mabungahon ang kalihukan gumikan sa pagtambayayong sa nasudnong kagamhanan, lalawigan, pribadong sektor ug sa mga hingtungdang lungsod sa pagpanalipod sa kalikopan ug pagpalig-on sa matag komunidad batok sa mga hulga sa kalamidad.
Dugang pa sa gobernador, dako kini nga tabang, sa strategic change agenda sa administrasyon, ilabina nga ang lalawigan naila isip UNESCO Global Geopark. ALT/PIMO
No comments:
Post a Comment