KADAGKUAN SA ARMY SPECIAL FORCES MIHIMO OG COURTESY CALL KANG GOBERNADOR AUMENTADO SA KAPITOLYO

Ang mga kadagkuan sa Special Forces sa Armed Forces of the Philippines (AFP) mipahigayon og courtesy call kang Gobernador Erico Aristotle Aumentado sa buhatan niini sa Kapitolyo.

Si Brigadier General Ferdinand B. Napuli, Commander sa Special Forces Regiment (Airborne) sa Philippine Army nibisita kang Aumentado Enero 17, kauban ang bag-ong commanding officer sa 21st Special Forces Company nga si Capt. Bilver Butale ingon man ang iyang gipulihan nga si Capt. Angelito Pangan.

Atol sa maong pagbisita, nagpadayag sa iyang pagpasalamat si Pangan sa suporta ni Aumentado sa mga kalihukan sa Special Forces nga nagbase sa Riverside, Bilar.

Gitunol ni Pangan ngadto sa gobernador ang usa ka sertipiko sa iyang pagpasalamat atol sa maong pagduaw.

Uban usab sa maong kortesiya sila si Maj. Marbien Delos Reyes, Maj. Louie Dandy Haro, 1Lt. Philip Viscaya, 1Lt. Junniel Gelbolingo ug Romeo Teruel, PTF- ELCAC focal person.

Gihisgutan ni Napuli ang mga proyekto sa Special Forces sa lalawigan partikular sa Dela Paz, Cortes sama sa Reverine Facility and Training School. Kini dunay pondo gikan sa Estados Unidos nga nagkantidad og $5 milyones apan nalangan ang konstruksyon niini gumikan sa mga kakulian bahin sa mga gikinahanglan nga dokumento.

Sa maong pagbisita, naghisgutan sa gobernador ang Camp Bernido nga naaapektuhan sa road widening.

Isip solusyon, plano ni Aumentado nga mangita ang kagamhanang probinsyal og dako ug hamugaway nga lote nga maoy magamit sa mga reservist.

Ang kasamtangang luna gamiton sa lain nga mga proyekto sa pangagamhanan.

Dugang ni Aumentado nga atimanon usab sa kapitolyo ang pagpatukod og edipisyo nga susama sa kasamtangang kampo sa lote nga balhinan niini.

Sa laing bahin, gituki usab ang problema kabahin sa Ubay Military Reservation Camp diin gipuy-an og pipila ka mga pamilya sa kasamtangan.

Matud ni Aumentado nga magkinahanglan og pondo gikan sa Office of the Social Welfare and Development (OPSWD) aron ipahiluna ang maong mga pamilya isip relokasyon.

Dugang pa niya, ang kagamhanang lokal sa Ubay andam muhatag og laing lote nga kabalhinan aron mahinlo ang maong kampo.

Nagpasalamat si Aumentado sa aktibong partisipasyon sa Special Forces sa pagpahiluna sa mga programa ug proyekto nga may kalabutan sa kahusay ug kalinaw sa lalawigan.ALT/ PIMO