Lima ka munisipalidad sa lalawigan ang gisuroy ni Gobernador Erico Aristotle Aumentado Enero 18 aron paghatod sa centenarian benefit gikan sa kagamhanang probinsyal ngadto sa mga benepisyaryo.
Nanungay sa paglibot ang gobernador alang sa maong katuyoan gumikan kay kasagaran kanila maluyahon na ang panlawas ug buot niini nga mahimamat ang maong mga centenarians.
Una nga giadto ni Aumentado ang Poblacion Alicia sa panimalay ni Martina Gumop-as human sa iyang pagtambong sa Founding Anniversary sa maong lungsod.
Kuyog kang Aumentado si Alicia Mayor Victoriano Torres III, Mita Tecson, hepe sa Office of the Provincial Social Welfare and Development (OPSWD) uban sa mga kawani sa maong buhatan. Ilang gitunol kang Lola Martina ang kantidad nga P100,000 ug ang mga sertipiko gikan sa Sangguniang Panlalawigan ug sa Buhatan sa gobernador kabahin sa maong benepisyo.
Personal usab nga giduaw ni Aumentado ang laing upat ka mga centenarians nga sila si Ma. Rosario Mangaron sa Bayongan, San Miguel; Valentin Saga, Buenos Aires, Carmen; Gliceria Digamon, Poblacion Sur, Batuan; ug Lamberto Laguitao sa Bil-isan, Dimiao.
Ang maong mga benepisyaryo pulos bag- uhay pa lang nga mitungtong sa pangidaron nga 100 ug nakadawat sa kantidad nga P100,000 gikan sa nasudnong panudlanan.
Si Dimiao Mayor Randolph "King" Ang mikuyog kang Aumentado sa pagbisita sa centenarian sa Dimiao. Gikan sa Bil-isan, mipatighulog ang grupo aron pagtambong sa blessing ug ribbon cutting ceremony sa Tabo sa Dimiao.
Si Aumentado nagkanayon nga mas maayo nga sa edad pa lang nga 75, ihatag na ngadto sa benepisyaryo ang pahalipay gikan sa lalawigan aron mas mapahimuslan sa hingtungdan ang maong gasa alang kaniya tungod kay mas askil pa kini.
Ang pagpanghatag sa centenarian benefit pinasikad sa Provincial Ordinance 2022-003 nga mas nailhan isip Bohol Centenarian Ordinance.ALT/PIMO
No comments:
Post a Comment