GOV ARIS UG CONG VANVAN NAGPASALAMAT SA CHED SA 107 KA MGA ESTUDYANTE SA SEGUNDO DISTRITO NGA NAKADAWAT SA P25K

Mokabat ngadto sa 107 ka mga tinun-an gikan sa nagkalain-laing tunghaan sa lalawigan ang nakadawat sa kantidad nga P25,000 ubos sa Student Monetary Assistance for Recovery and Transition (SMART).

Si Gobernador Erico Aristotle Aumentado mipadangat sa hamubo nga mensahe sa pagdasig ug pahalipay ngadto sa 107 ka mga tinun-an nga nagtapok sa Bohol Island State University (BISU) Main Campus dakbayan sa Tagbilaran Enero 23.

Mapasalamaton ang gobernador sa programa nga gilusad sa Commission on Higher Education (CHED) tuig 2023 subay sa Resolution No.112-2023 niadtong Marso 9, 2023.

Kini, aron makatabang sa mga tinun-an nga makapadayon sa ilang pagtungha human naapektuhan ang panudlanang pinansyal o panlawas sa nakalabay nga pandemya.

Ang mga benepisyaryo sa SMART program mao ang mga undergraduate nga estudyante sa nagkalain-laing tunghaan sa lalawigan nga lumulupyo sa ikaduhang distrito.

Kini ubos sa paninguha ni Kongresista Vanessa Aumentado nga makatapos sa kolehiyo ang mga apektadong tinun-an.

Sa iyang fb page, si Kongresista Aumentado nagkanayon nga ang CHED nagahin og P2.7M. alang sa one-time financial assistance alang sa 109 ka mga estudyante ubos sa undergraduate program nga nagtungha ning academic year 2023- 2024.

Giatiman sa iyang buhatan ang pagpahiluna sa mga aplikante gikan sa ikaduhang distrito, ngadto sa CHED diin 109 ang mipasar subay sa gikalatid nga criteria.

Ang maong SMART program pinasikad sa CHED Memorandum Order No.08 series of 2023, "Guidelines on the Student Monetary Assistance for Recovery and Transition" ubos sa Republic Act. 7722 o Higher Education Act of 1994.

Basi sa guidelines nga gipatuman sa CHED, pinaagi ning maong programa, ang kwalipikado nga benepisyaryo makadawat og P25,000, isip one-time fixed grant.

Iduso ngadto sa CHED ang mga gikinahanglan nga dokumento sama sa certificate of registration/ enrollment (COR/COE) isip pagmatuod sa enrollment uban sa pinirmahan nga SMART application form, ug indigency certificate gikan sa hingtungdang barangay nga gipuy-an sa aplikante.

Malaumon ang gobernador nga mas daghan pa ang matabangan sa CHED nga mga tinun-an sa kolehiyo nga pursigido nga makatapus ubos sa nagkalain-laing mga programa.

Ang SMART program nga naselyuhan Agosto 7, 2023, gitakda nga matapos ning maong fiscal year 2023.ALT/PIMO