GOV. ARIS MIPAKANAOG SA MEMORANDUM CIRCULAR ARON PALIHUKON ANG BANTAY-PRESYO SA KALUNGSORAN

Gipakanaog ni Gobernador Erico Aristotle Aumentado ang usa ka memorandum circular tumong sa pagpalihuk sa mga ahensya sa pagbantay sa presyo sa mga palaliton.

Gipirmahan ni Aumentado ang Memorandum Circular Numero 1, penetsahan Enero 31 isip tubag sa padayon nga pagsaka sa presyo sa isda sa pipila ka mga dapit sa lalawigan.

Bisan pa nga nagpanghitabo kini sa taas nga panahon sulod sa daghang katuigan, nakahukom ang gobernador nga buhi-on ang usa ka lagda nga wa hingusgi.

Taliwala sa mga lakang nga gipatuman sa kagamhanang probinsyal aron masolusyonan ang maong ekonomikanhong problema, namatikdan nga di pa kini igo.

Ang maong Memorandum Circular nagtumbok sa pagbuhi o pagpaaktibo pagbalik sa joint memorandum circular nga gilagdaan niadtong Agosto 10, 2020, subay sa Article 2 sa Republic Act No. 7394 (Consumer Act of the Philippines) ug Republic Act No. 7581 ( Price Act).

Lambigit niini ang Department of Interior and Local Government Memorandum Circular No.2918-128 nga pinetsahan og Agosto 14, 2018.

Subay sa Implementing Rules and Regulations ( IRR) sa Price Act, giumol ang Local Price Coordinating Council alang sa maong katuyuan pagsubay sa presyo sa mga nag-una nga panginahanglan ug palaliton sa matag hingtungdan nga kalungsoran.

Ang maong memorandum circular alang sa tanang mga mayor sa kalungsuran ug sa nag-inusarang dakbayan sa lalawigan gumikan kay nakit-an sa gobernador nga gikinahanglan ang pagpalihok sa City o Municipal Price Coordinating Council sa ilang tagsa-tagsa ka lokalidad ug sa dakbayan sa Tagbilaran.

Sumala sa tahas sa maong City/Municipal Price Coordinating Council dili lang kini magasubay sa presyo sa palaliton, makahimo usab kini pagrekomendar og suggested retail price (SRP), ug sa pagpatuman niini.

Matud ni Aumentado nga gikinahanglan ang usa ka hiniusa nga paglihok sa probinsya (whole of province approach), kauban ang tanang Local Government Units aron masolusyonan ang pagkontrolar sa presyo sa palaliton partikular sa isda.

tol sa gipahigayon nga meeting ni Aumentado tali sa mga membro sa Task Force Isda, Enero 29, uban sa kanhi Regional Director sa Bureau of Fisheries and Aquatic Resources (BFAR), nga karon executive assistant for fisheries, Al Piloton, kauban si provincial administrator Asteria Caberte, hepe sa Bohol Provincial Environment Management Office (BPEMO)Jovencia Ganub, OIC sa Provincial Cooperative Development Office(PCDO) Ma. Conrada Fuentes, ug mga executive assistants, kanhi RD sa Agriculture, Ricardo Oblena, uban ni Salvio Madanguit ug Gil Bongato, nakit- an ni Aumentado nga ang pagpalihok sa maong konseho usa ka epektibo nga pamaagi pagsumpo sa nagpadayon nga problema bahin sa presyo sa isda.

Sa laing tigum nga gipahigayon ni Aumentado kauban si manlalaban Filipina Piollo, chief of staff sa kapitolyo, ug si manlalaban Handel Lagunay, hepe sa Provincial Legal Office, gihapsay ang pagpakanaog sa maong memorandum circular.PIMO/ALT.