Response to Active Shooting Incidents Simulation Exercise

Response to Active Shooting Incident (RASI) ang gitutukan sa Bohol-Panglao International Airport Police Station sa pagkakaron, busa ilang gipahigayon ang Full Scale Inter-Agency Simulation Exercise bahin niini niadtong Septyembre 27, 2022 diha mismo sa BPIA Complex. Ang gobernador sa Bohol, Hon. Erico Aristotle C. Aumentado nga mas nailhan sa  tawag nga Gob. Aris o GAA, misaksi niini  kauban ang Provincial Executive Assistant sa Peace Order Public Safety and Security (POPSS) Art Mendez Evangelista.

Ang kagamhanang Probinsyal buot makasiguro nga kontrolado ang sitwasyon ug namintinar ang kahapsay ug kalinaw isip pagpangandam sa dugang mga investors nga musulod dinhe sa Bohol. Kini ang hinungdan nga gipalihok niya ang tanang ahensya sa probinsya nga nagatutok sa peace and order. Panglantaw  ni Gob. Aris nga kung andam ang probinsya pagtubag sa mga hulga batok sa seguridad, kampante usab ang  mga investors nga mubobo sa ilang patigayon sa Bohol, busa mudaghan ang trabaho ug daghang Bol-anon ang makabenipisyo.   

Desidido  ang first-timer nga gobernador  nga iyang mapauswag ang ekonomikanhong kahimtang sa  mga yano nga mga Bol-anon. Iyang timon, ang fifteen point development agenda nga kasamtangang  arangkada na karon. Walay giusikan nga panahon ang gobernador, gani double time  ang iyang lihok aron  mapatalinghugan ang tanang mga stakeholders nga mubisita kaniya sa kapitolyo. Buot niya nga masuta kung unsa gayod ang tinud-anay nga kahimtang sa  katawhang Bol-anon ug nakaabot ba ngadto kanila ang mga proyekto ug programa nga gipahigayon alang sa mga katawhang Bol-anon. 

Gani, bisan sa kadaghan sa iyang giatiman, apan mudalikyat gyod siya pag-adto sa kabarangayan kay buot niyang masayran kung epektibo ba ang mga lakang nga nasugdan pinaagi sa development agenda  aron nga positibo usab, ang pag-abante ngadto sa unahan. Apil na niini ang pagsiguro nga luwas ug malinawon ang katawhang Bol-anon. Maoy iyang kalab-uton nga, sa dili pa matapos ang first one hundred days sa Abante Bohol administration, plastada na ang mga kalihukan nga mupalambo sa probinsya sa Bohol.

 Dili mawala sa calendar of activities sa gobernador ang mga kalihukan nga may labot sa seguridad  ug pagpanalipod sa probinsyang Bol-anon. Matag karon ug unya, ginasubay ni Gob. Aris kung unsa ang mga lakang nga ginabuhat sa mga kapolisan ilabina niadtong panahon nga adunay hungihong  sa tulis ug pagpangkidnap diha sa kalungsuran. Alerto ang POPSS pinaagi  kang EA Evangelista sa pag-address niini, nga gani miabot sa punto nga si Gob Aris mismo muhatag ug ganti nga salapi sa makahatag ug impormasyon niining mga tawhana ug nasayran nga dili  kini angay kabalak-an kay usa lamang kini nga failure attempt pagguba sa imahe sa probinsya.

Ang Philippine Army  mihatag sa ilang tibuok nga suporta ngadto sa iyang administrasyon sa ilang pagbisita sa kapitolyo July 07, 2022. Ang Philippine National Police-Bohol (PNP-BPPO) ug National Police Comission (NAPOLCOM) mihimo usab og courtesy visit ngadto sa gobernador July 20, 2022 ug mipadangat sa ilang pledge of support. Wala usab magpaulahi ang  PMFC/ SWAT Bohol sa ilang pledge of commitment ug daghan pa ang mipahayag sa ilang suporta aron pagsiguro nga malinawon ang probinsya.

 Ang panglantaw sa gobernador bahin sa peace and order wala malansang diha lamang sa pagpalambo sa ekonomiya tungod may kahingawa gayod usab siya sa kinabuhi nga giguba sa ginadiling droga. Maoy hinungdan nga gipalihok usab niya ang sektor nga  adunay tahas niini. Karon lang bag-o, laing grupo na usab ang malampusong migradwar sa Drug Education and Counselling diin, makusganon nga hangyo sa gobernador ngadto kanila nga mutabang aron masumpo ang pagpangguba sa kinabuhi niining gitawag sa uban nga “otot sa demonyo”. Ang mga migradwar, mga batan-on ug mga edaran nga kanhi nailalom sa ginadili nga droga apan human sa counselling ngadto kanila, misaad na kini sa hugot nga pagtalikod sa mga ginadiling droga mga droga. Si Gob. Aris may kahingawa sa tanang anaa sa nagkalain-laing hut-ong sa katilingban. Senyales lang kini nga sa mithi sa  pag-abante, ang mga Bol-anon magdungan ug walay maulahi.

Tataw nga dili lang topiko sa pag-asenso ang nagduwa sa hunahuna ug kasingkasing ni Gobernador Aris Aumentado, alerto usab siya nga nagbantay sa lakaw sa panahon. Matag karon ug unya ginapahigayon sa iyang team ang kalit nga pagbisita sa Provincial Disaster Risk Reduction and Management Office (PDRRMO) ug Fire Stations aron  pagsuta kung igo ba ang pagpangandam nga gibuhat ning maong mga opisina kung pananglitan adunay muabot nga mga kalamidad.

Ang mga investors ug mga turista mapalokal man o langyaw key players sa gipunting nga kalamboan, ug magsugod kini dinhe sa mga point of entries sa atong probinsya, sa mga borders, mga pantalan ug airport. Maoy hinungdan nga gipanghingusgan ang pagsiguro nga abtik ang mga kapolisan sa BPIA sa pagresponde  sa mga kalit nga insidente nga posibleng magahatag ug kadaot sa mga byahedor nga anaa sa BPIA complex. Mipailalom kini sila sa daghang mga trainings aron makasalig ang mga katawhan nga ang muanha sa Bohol makabati sa seguridad nga sa ilang pagbyahe  sa probinsya, anaa sila sa maayong mga kamot. Matod pa sa kapolisan “Life is beautiful”, “KALIGTASAN MO, SAGOT KO”.

Proteksyon ug paghigugma sa iyang mga giserbisyuhan, maoy kanunay niya nga hinagiban sa iyang pagpangulo nga muabante sa mauswagong ugma. Kudos Gobernador  Erico Aristotle  C. Aumentado.