Nagpahigayon og usa ka breakfast meeting si Gobernador Aris Aumentado, didto sa iyang buhatan sa Kapitolyo, dakbayan sa Tagbilaran, isip pag-abiabi sa mga representante sa 16th World Bank Implementation Support Mission, niadtong Nobyembre 18.
Ang WB gipanguluhan ni Anna Wellenstein, ang Sustainable Development Regional Director for East Asia and the Pacific, ang World Bank Mission.
Gitambungan kini sa Philippine Rural Development Program (PRDP), ug sa DA-RPCO7 pinanguluhan ni Engr. Cirilo Namoc uban ang PPDO nga ginanguluhan ni Atty. John Titus Vistal ug Engr. Ronilita Bunado.
Gipasalamatan sa Gobernador ang WB sa mga suporta niini sa Kagamhanang Probinsyal sulod sa daghang katuigan.
Si Wallenstein nagpasalamat usab ngadto kang Aumentado sa mainitong pag-abiabi. Nakadayeg siya sa aktibo nga liderato sa Gobernador, pagpakighinabi sa Presidente ug sa mga hingtungdang mga ahensya, pagkab-ot og suporta, aron paspas mapatuman ang strategic change agenda niini.
Gidayeg ni Wallenstein ang Bohol Island sa pagbaton og talagsaon nga pasidungog gikan sa UNESCO isip nag-inusara nga Global Geopark sa tibuok nasod. Apil niini nga giila ang kusganon nga pagpanalipod sa 48,000 nga mga mamuhiay og baboy o ang P6 Billion nga industriya sa baboy, batok sa ASF nga Bohol ug Siquijor na lamang ang bugtong nagpabilin sa Rehiyon 7 nga ASF Free o anaa sa Dark Green Zone.
Apil nga gipasidunggan sa World Bank ang PPMIU ug ang tibuok Technical Team sa Bohol Provincial Government, sa maayo nga pagdumala sa mga proyekto sa PRDP nga ilang gipondohan.
Samtang sa laing bahin, gipresentar ni Gov. Aris ngadto sa World Bank, pinaagi kang Atty. John Titus Vistal, sa PPDO, ang katikaran sa mga ginalihok nga proposed Sustainable Inclusive and Reselient Tourism (SIRT) projects sa Kagamhanang Probinsyal, subay sa MOA sa TIEZA ug World Bank bahin sa Bohol Bulk Water Supply Projects, Solid Waste Management Facility, Tourism Site Enhancement and Management(TSEM), Bohol Destination Markets Program( Palengke Program) ug uban pa.
Gituki usab ang proposal ni Gov. Aris ngadto sa DPWH bahin sa Circumferential Road nga gitawag og Super High Way. Dako ang pagtuo ni Aumentado nga tubag kini sa problema sa trapiko.
Ang pagtukod og SABO dam sa Loboc gipresentar usab. Subay sa pagtuon, nakit-an nga kung mamuntar ang maong dam, mapugngan niini ang kusog nga pagbaha sa Loboc River panahon nga adunay bagyo nga sama sa bagyong Odette.
Gikauyonan nga himuon ang dugang diskusyon bahin niini sa Nobyembre 20, 21 ug 22 kauban si Atty. Lesley Jeanne Yu Cordero Senior Disaster Risk Reduction Specialist ug ang ubang representante.
Kahinumduman nga niadtong Septyembre 28, 2023, nadawat sa PGBh ang pag-ila nga Good Governance Practices gumikan sa maayo nga implementasyon sa mga PRDP Sub-Projects sa probinsya.
Nakuha sa mga hingtungdang benepisyaryo ang pinakamaayo nga grado taliwala sa tibuok Rehiyon, sa nakalabay nga Operation and Maintennace Audit System( OMAS) sa Regional Operation and Maintennace Audit Team ( ROMAT) gikan sa DARFO7 DA Regional Director nga si Angel Enriquez.
Taho gikan sa PRDP-RPCO7, gikan sa Oktubre hangtod Disyembre 2022, ang 6.94 km Dagnawan to Dagohoy FMR sa Inabanga, nakakuha usab og maayo nga grado sa OMAS.
Duha ka infra sub projects, nakakuha og No Objection Letter 2( NOL2) sa National Project Coordination Office(NPCO) sa PRDP, niadtong November 28, 2022 sa dihang anaa na sa posisyon si Aumentado.
Ang mga sub projects mao ang10.97 KM Rehabilitation of Campagao to Cabacnitan FMR sa Bilar, kantidad P170.52 M., ug ang 4.74 KM Rehabilitation sa Pondol to Candaigan FMR sa Loon kantidad P91.44 M.
Ang NOL2 senyales nga pwede na iaward ang maong proyekto kay nasulbad na ang depektuso o aberiya sa maong proyekto.
Ang PRDP uban sa Kagamhanang Probinsyal malampuson nga napahiluna ang mga livelihood ug micro enterprise projects sa nagkalain laing lungsod sa Bohol.
Pagkahuman sa maong pagbisita, nipatighulog ang WB ngadto sa barangay Pondol alang sa site visitation ngadto sa Pederasyon sa Gagmay'ng Mananagat ug Mag-uuma sa Loon (PEGAMALO), alang sa pagsuporta ning maong asosayon sa ilang proyekto nga Bahalina de Loon.
Mapasalamaton ang Gobernador sa World Bank, diin matod pa niini, padayon ang paningkamot sa administrasyong Aumentado-Balite pagpalambo sa Bohol.ALT
No comments:
Post a Comment