Gisugdan ni Gov. Aris ang iyang unang semana sa kapitolyo pinaagi sa pagsubay sa mga kaislahan sa lungsod sa Tubigon, aron sa paghatod og mga food packs sa mga naapektuhan niining nagsagunson nga subasko ug dili maayong panahon, ilabina niadtong bagyong Paeng sa miaging tuig.
Gikan sa pantalan sa Tubigon, mukabat og labing menos usa ka takna ang byahe paingon sa isla Mocaboc sa usa ka ordinaryo nga “pumpboat” kay kining maong isla anaa mahimutang tunga-tuga sa Bohol ug Cebu. Tungod kay daw nabulag ang maong isla gikan sa lungsod, posible nga dili maatiman ang mga panginahanglan sa komunidad bahin sa mga serbisyo nga gikan sa Kagamhanan. Kini maoy usa sa mga hinungdan nga gitutukan sa gobernador ang pagpakighimamat kanila aron masayran ang tinuod nila nga sitwasyon ug matun-an kung unsa ang tabang nga angay unahon para kanila.
Apan dili lang ang Mocaboc ang gitabok ni Gov. Aris niadtong Enero 6, kundili apil na ang Isla Bagongbanwa ug Isla Bilangbilangan.
Sa iyang paghiabot sa Isla Mocaboc, misugat sa iyang panan-aw ang mga guba nga kabalayan apil na ang “multi-purpose building”. Human sa pagpakighinabi ngadto kang kapitan Aquilao Batausa, mga opisyales ug residente, gipahigayon dayon ang pag apod-apod sa mga food packs ngadto sa 243 ka mga pamilya(figures source -Brgy. Captain Batausa).
Kauban ni Gov. Aris sa “Food packs Distribution” mao ang PSWDO, MSWDO ug Tubigon Mayor William Jao. Samtang paingon na sa pikas isla ang gobernador, nakakuha sa iyang atensyon ang mga pulong nga sinuwat sa usa ka piraso nga papel, gipapilit sa bungbong diin miingon, “It is a great pleasure for us to say THANK YOU” ug “We are happy and grateful to have you here, GOVERNOR ARIS fr. Supporters”. Natandog ang boutang gobernador, kay dili man tuod tanan makasulti kaniya sa ilang tuyo apan, ang kasing-kasing sa mga supporters dili kapugngan sa pag-ekspresar sa ilang dakong kahinangop sa pagduaw ni gov. Aris ngadto kanila.
Sakay sa speedboat, miderecho ang team sa gobernador didto sa isla Bagongbanwa. Mainiton sila nga gisugat ni kapitan Rochelle Primacio ug giandaman sa paniudto. Didto sa taas nga lamesa, anaa ang daghang mga saang, sunghan nga sinugba, escabeche, nilarang, sinabawang isda, piniritong nokus sa harina ug daghan pang pagkaon, nga nakahupay sa kakapoy gikan sa byahe.
Human sa paniudto ug kukabildo uban sa kapitana ug mga opisyales, gihimo dayon ang pag-apod-apod sa food packs kay aduna pa’y laing isla nga adtuon. Adunay 322 ka mga pamilya ang nahatagan sa food packs. Matod pa sa usa ka BHW sa barangay Bagongbanwa nga kaniadto 332 sila ka pamilya apan sa dihang na wash out ang ubang panimalay niadtong buwan sa Hunyo, 322 nalang ka pamilya ang nahibilin kanila.
Makasubo man nga impormasyon, apan ang ilang gikinahanglan sa pagkakaron mao ang inspirasyon sa pagbangon.
Sa ikatulong isla nga gibisita, makapalipay ang paagi sa pagsugat ni kapitan Rogelio R. Obguia ug sa tanang opisyales sa barangay Bilangbilangan ngadto team ni Gov. Aris. Naglinya silang tanan sa baybayon, ug mitagsa-tagsa paglamano sa tanan nga mikanaog sa pumpboat uban ang maabiabihon nga mga panagway. Wala manumbaling ang gobernador sa kakapoy sa ilang lakaw kay nagsulabi sa iyang kasing-kasig ang kahinangop pagpakighinabi sa mga residente.
Gihatagan sa team og food packs ang 162 ka pamilya. Si Crismelyn Torrejos, usa ka BHW, 29 anyos ug adunay tulo ka anak, daw mutulo ang luha sa pagsugilon sa ilang kahimtang sa isla sa dihang gikumusta. Matod pa ni Crismelyn, nga panagat ra ang panginabuhi sa maong gamay nga isla. Sa ingun aron nga sagunson ang daotang panahon daw malubag ang ilang utok sa paghuna-huna kung unsa ang ipakaon sa mga bata.
Byernes kadto,ug ang ilang mga anak anaa sa lungsod nag-eskwela kay eskwelahang elementarya ra ang kaya sa ilang barangay. Hapon na apan walay balita kung makapauli ba ang ilang mga anak gumikan lisod ang byahe, dili lang tungod sa kalayo apan wala usab sila’y ikapamasahe. Maoy ilang handuraw nga unta adunay makatabang kanila ug pumpboat aron adunay masakyan sa mga estudyante sa ilang pagpaingon sa ilang eskwelahan sa pikas nga tampi.
Atol sa maong mga pakigsandurot, gipasabot sa gobernador ang pagkamahinungdanon sa pagkooperar ngadto sa mga programa sa kagamhanang probinsyal nga sa ingun dali ang pag-uswag. Apil sa gihisgutan mao ang pag implementar sa Fish Buy Back System sa kaislahan, ang pagbantay nga dili makasulod sa probinsya ang karneng baboy gikan sa gawas sa Bohol aron malikayan ang kaso sa African Swine Fever (ASF) ug ang pagpangandam sa proyekto nga ilang gamitan sa tabang pinansyal nga iapod-apod sa ilang mga barangay sa umaabot, kantidad P200,000.00.
Ang PSWDO Head Mita Tecson, mipasabot usab bahin sa pagproteher sa kabataan batok sa mga dili maayo nga impluwensya sa social media. Samtang si mayor Jao, midasig sa tanang lumulupyo sa pagsuporta sa mga program ni gob. Aris.
Palakpakan ang tanan sa mga higayon nga muhatag sa mensaheng pagdasig ang gobernador. Makita sa ilang mga pamayhon ang kalipay nga bisan sila halayo sa lungsod nga daw napriso sa maong lugar, apan ang gobernador migasto gayod sa panahon ug kusog pagduaw kanila sa maong isla.
Mipauli ang team ni Gov. Aris nga balon ang tam-is nga mga pahiyom sa mga islahanon.
No comments:
Post a Comment