ANG REGALO NGADTO SA GOBERNADOR SA IYANG ADLAWNG NATAWHAN

Ang kasingkasing ni Gob. Aris puno sa mga pangindahay alang sa bag-ong ugma para sa mga Bol-anon. Sa iyang unang unom ka bulan pagserbisyo isip gobernador sa probinsya sa Bohol, dili lamang pagpauswag sa ekonomiya, turismo, agrikultura ug uban pang mga development agenda ang gusto niyang iimplementar, kundili, apil usab niini ang pag-atiman sa mga nagtrabaho sa Kagamhanang Probinsyal, bag-o man o daang empleyado apan ilabina kadtong miboluntaryo pagtabang sa panahon sa kampanya. Sa iyang ika kwarentay singko nga adlawng natawhan, “unang birtde sa kapitolyo” ang iyang nahiuna nga plano.

Apan dako ang kahingawa sa gobernador sa dihang nahitabo ang trahedya ngadto sa mga residente sa Poblacion Dos, Dakbayan sa Tagbilaran, Disyembre 23 sa miaging tuig. Bisan nagkapuliki niadtong higayona tungod sa daghang mga lakaw apan gigahin sa gobernador ang iyang panahon pagbisita sa mga nasunugan ug paghupay sa ilang kaguol nga nawala kanila ang tanan nilang hinaguan, ilabina nga adunay nakabsan sa kinabuhi.

Sa adlaw nga natawhan ni Gov. Aris, mibalik siya sa Poblacion Dos Multi-Purpose Gymnasium tungod kay sakto nga nahuman usab ang proseso pagpagawas og tabang pinansyal alang sa mga nasunugan ug aron pagselebrar sa iyang “birthday” kauban ang mga biktima sa sunog. Didto adunay banda gikan sa kapitolyo nga mitukar ug milingaw kanila sa mga maanindot nga mga awit. Gituman usab ni Gob. Aris ang iyang saad nga adunay ipanghatag sa matag pamilya kantidad dyes mil pesos (P10,000) ug traynta mil pesos (P 30,000.00) alang kang Greaymar Manzano, ang nagbangutang anak sa magtiayon nga naapil sa sunog.

Todo suporta usab ang first lady sa gobernador, Congresswoman Vanessa C. Aumentado nga maoy nagpadala og lima (5) ka lechong baboy aron saw-an sa 313 ka mga pamilya o 75 ka mga household mga anaa sa evacuation center. Adunay mga foodpacks ug drinks nga gipa apod-apod sa team ni CVA aron kompleto ang paniudto.

Gidugang usab niini ang dose ka sako nga bugas humay gikan sa kapitolyo (PDRRM) nga giapil ug hatag ngadto kanila ug uban pang mga hinabang.

Matod sa gobernador nga mas gusto niya nga makig-uban sa mga biktima sa iyang adlawng natawhan ug giisip niya kini nga makahuluganon niyang selebrasyon.

Ang mga pahiyom sa mga nasunugan nga iyang nakita sa ilang mga pamayhon atol sa iyang adlawng natawhan, mao ang pinakaanindot nga regalo nga iyang nakaplagan, kay kini nagpasabot nga nakahatag siya ug pag-alibyo sa dili maayo nga mga kasinatian sa mga biktima.

Kauban sa magtiayong Gov. Aris ug Congresswoman Van si mommy Greenie sa maong okasyon uban ni bise Gobernador Victor Balite, Tagbilaran City Vice Mayor Adam Jala, Brgy. Capt. Allan Real, SK Chairman Tom Cesar Vergara, PDRRM Action Officer Anthony Damalerio, PSWDO Head Carmelita Tecson, EA Metodio John Maraguinot ug ang uban pang mga volunteers.