Sa ika “saingkwenta’y sais” ka adlaw sukad naumol ang “15-point Development Agenda” sa bag-ong administrasyon, malampuson nga gipahigayon ang Farmers and Fisherfolks Forum adlawng Hwebes Agosto 25, 2022 didto sa NIA Covered Court, Tagbilaran City, Bohol.
Sa mensahe ni Hon. Erico Aristotle C. Aumentado ngadto sa mga Mag-uuma ug mga Mananagat, iyang giekspresar ang iyang dakong kahinangop nga masayran ang matood nila nga kahimtang diha sa tagsa-tagsa nila ka mga dapit aron mapanghingusgan ang lakaw sa agrikultura sa probinsya ug aron mapalig on ang mga “people’s organization” ug mga kooperatiba subay sa nalatid sa maong nahisgutan nga “development agenda.”
Matod pa sa gobernador, ang agrikultura mao ang “foundation” sa pagpadagan sa ekonomiya sa Bohol. Busa ang mga mag uuma ug mga mananagat angay nga suportahan ug dili pasagdan kay kining maong sektor maoy gigikanan sa pagkaon sa katawhan.
Gipalanog sa mga mitambong niining forum ang ilang pagsanong sa awhag nga magtinabangay ug dili mawad an sa paglaum hinuon, nga mupadayon taliwala sa mga gisagubang nga epekto sa pandemya, bagyong Odette ug uban pang mga kakulian.
Ang mga mag uuma ug mga mananagat, nahatagan sa kahigayonan nga madungog ang ilang mga tingog pinaagi sa pagsaysay sa ilang mga sitwasyon ug sa pagpahungaw sa ilang nasinati nga mga suliran bahin sa pagpananom ug mga pagpanagat. Giindorsar ni Gob. Aris ang napatalinghugan nga mga problema ngadto sa mga haom nga ahensya,aron magtambayayong alang sa mga kasulbaran.
Ang maong kalihukan diin gidumala sa opisina sa Acting Provincial Agriculturist Dr. Larry Pamugas milungtad sa usa ka adlaw, ug kini gitambungan sa OIC-Regional Executive Director DA-7 Joel A. Elumba, Executive Assistant for Agriculture Eng. Ricardo D. Oblena CESO III, OIC-Center Director ATI-7 Dr. Gracia F. Arado, NIA Regional Office-Boy Apale, BFAR- Provincial Fishery Officer, PCA-Bohol, PSA-Bohol, mga “Municipal Agriculturists”, mga “stakeholders” ug si Vice Gob. Dionisio Victor A. Balite.
Samtang sa laing bahin, si Bise Gobernador Hon. Dionisio Victor Balite makusganong nagdasig sa mga mitambong niining “forum” atol sa iyang paghatag ug inabrihang makadasig nga mensahe nga dugangan ang pagpananom ug pag tudlo sa mga kabatan-onan nga mulambigit sa agrikultura aron maoy muhulip sa edaran na nga kapamilya, ug dili na makahimo sa pagpanguma o pag pangisda. Kining maong “forum”, gitambungan sa mga “chairperson” sa mga kooperatiba ug presidente sa mga “People’s Organization”.
No comments:
Post a Comment